Ră anai hơdôm boh sang sĭ mơdrô, sang čơ, sang siêu thị ƀơi plơi prong Buôn Ma Thuột, Dak Lăk dik dak mơ-ak hrơi Tê̆t yơh. Ƀing sĭ mơdrô anet wơ̆t hăng sang siêu thị hơmâo pơhrup hiam, pơdă gơnam tơket tơkeng bơwih brơi mơnuih ƀôn sang nao blơi amăng hrơi Tê̆t. Siêu thị Co.op mart Buôn Ma Thuột hơmâo pioh lui gơnam sĭ amăng hrơi Tê̆t nua ñu rơbêh 80 klai prăk, amăng anun gơnam Việt hơmâo truh 90%. Siêu thị hơmâo anŏ apah, kơđô, pơtrun nua hơdôm rơbâo mơta gơnam mơ̆ng lơ 1/12/2024 truh lơ 28/1/2025.

Gơnam hơđong nua rơbêh kơ 20% anun lĕ: gơnam ƀong huă, mơnŏng bui mơnŭ, boh troh añăm pơtăm hăng hơdôm mơta gơnam juăt hơmâo amăng hrơi tê̆t. Kiăng pơhlôm hơđong anih sĭ mơdrô amăng rơnuč thun hăng Tê̆t thun phrâo Ất Tỵ 2025, Jơnum min mơnuih ƀôn sang tơring čar Dak Lăk hơmâo ngă Akŏ bruă pơđom pioh gơnam juăt blơi. Ră anai, 11 anom bơwih ƀong prong prăp lui laih mrô gơnam nua ñu rơbêh 507 klai prăk, dưi sĭ kơ 36,4% mrô mơnuih kiăng blơi. Hơdôm mơta gơnam nua hơđong hơmâo mơnŏng ƀong huă, gơnam ƀong pơkra lui hlâo, mơnŏng akan, ia luil, sik, ƀô̆t ngôt, boh troh añăm pơtăm, hăng ia săng ia jâo.