Ƀơi mông bưp nao rai lu khua mua lăi pơthâo tơlơi pơhing hlăk hơmâo ƀơi rŏng lŏn tơnah hăng amăng kual, hơdôm boh tơhnal tŭ yua hiam kơ bruă pơđĭ kyar bơwih ƀong huă ƀơi tơring čar Dak Lak thun 2022, anăp ngă bruă pơđĭ kyar amăng thun 2023 hăng hơdôm thun tŏ tui. Thun 2022, tơlơi pơhing bơwih ƀong huă mơnuih mơnam tơring čar Dak Lak hơmâo rŭ glăi tŭ yua klă hiam lu bruă mă. Abih bang tơhnal pơtrun tui Hră pơtrun jơnum ping gah ba tơbiă dưi ngă djơ̆. Thun 2023, Dak Lak kơtưn gir bơwih ƀong huă dưi djop 8% pơkă hăng tơhnal pơtrun thun 2022.

Pơhiăp amăng mông jơnum, ơi Võ Văn cảnh, Kơ-iăng Khua Jơnum min mơnuih ƀôn sang tơring čar Dak Lak lăi pơtong: kiăng dưi ngă boh tơhnal anai, hrom hăng tơlơi gir run, tơlơi pơmin run ran ngă bruă khut khăt hloh, git gai, pơčrâo bruă ngă tui djop bruă jao kơ ping gah, gong gai kơnuk kơna, mơnuih ƀôn sang hăng ling tơhan amăng tơring čar. Laih dơ̆ng, khua mua tơring čar čang rơmang ăt tŭ mă lu tơlơi đing nao hloh mơ̆ng khua mua ling tơhan djop rơnuk kiăng Dak Lak tañ ngă giong tơhnal pơkă bơwih ƀong huă, mơnuih mơnam hơmâo pơtrun laih.