Jơnum min mơnuih ƀon sang tơring čar Dak Lăk phrâo ngă hră mơ-it kơ Ding jum Bruă hmua hăng Pơđĭ kyar ƀon lan pơgăn glông ia rô Dơnao kŏng ia Krông Pač gah hlâo amăng akŏ blan 3 thun anai. Kơčăo bruă Dơnao ia Krông Pač gah hlâo jing bruă bơwih ƀong gah dơnao ia yôm phun hơmâo Ding jum Bruă hmua hăng Pơđĭ kyar ƀon lan pơsit ngă bruă amăng thun 2009, laih anun pơphun pơkra amăng thun 2011, hăng prăk pioh pơkra rơbêh 4.420 klai prăk, yua Anom bruă wai lăng tuh pơ plai hăng Man pơkra Dơnao ia mrô 8 ngă pô pơkra.

Lơ̆m ngă giong, pơphun mă yua amra dưi pruih brơi giăm 15.000 ha lŏn ngă hmua; djru brơi 9.620 boh sang anŏ hơmâo bruă mă, tơlơi hơdip đĭ kyar, ngă hiam anih tuai čuă ngui, rông akan hơdang. Truh mông anai, anih pơkra Dơnao kŏng ia Krông Pač gah hlâo hơmâo rơbêh 90% mrô ia, hơdôm boh bơnư̆, amăng bưng pơđoh ia ăt hơmâo mơn 80 -85% mrô ia.