Đơ đam tơring čar Dak Lak hơmâo 639 boh sang glưh abih kiăng man pơdong glăi; 880 boh sang răm rai kơtang hăng 5.240 boh sang răm ƀiă, pok bơbung kiăng pơkra ming. Truh ră anai, Dak Lak hơmâo man pơdong phrâo 176 boh sang; him lăng amăng rơwang hrơi tơjuh anai amra tŏ tui man pơdong phrâo giăm 450 boh sang hăng giăm 233 boh sang dong amăng rơwang hrơi tơjuh pơ anăp. Kơnong hơdôm boh sang răm ƀiă hơmâo pơkra ming hơmâo ngă pơgiong laih; hăng hơdôm boh sang răm lu ƀiă, glăk pơkra giong giăm 70%, mrô dŏ glăi-hơdôm boh sang mơnuih hơdip hajăn-amra hơmâo tơhan kông ang, ling tơhan Quân khu 5 djru brơi, pơhlôm giong hlâo lơ lơ 31/12.

Ơi Tạ Anh Tuấn, Khua Jơnum min mơnuih ƀôn sang tơring čar Dak Lak brơi thâo, rơngiao kơ bruă ječ ameč man pơdong hăng pơkra ming, tơring čar glăk pơsir hĭ 47 anih khŏm ba nao pơdong pơ anih phrâo yua plơi pla hơđăp dong amăng kual lŏn tơhroh. Anai lĕ hơdôm anih ngă kaih ƀiă pơhmu hăng pơkŏn samơ̆ ăt dong amăng hơdôm bruă kiăng ngă pơgiong tui tơlơi git gai mơng Khua dêh čar. Tơring čar ba tơbiă dua tơhnal pơkă bruă mă, hơmâo ngă pơgiong hlâo lơ 31/12/2025 hăng hlâo lơ 31/1/2026. Kiăng pok pơhai ha amăng plĕ, tơring čar hơmâo jak iâu pơgôp rơbêh 200 klai prăk mơng hơdôm anom bruă djru ba brơi kơ bruă man pơdong phrâo hăng pơkra ming sang dŏ brơi mơnuih ƀôn sang. Hrŏm hăng anun, Dak Lak hơmâo pok pơphun jơlan hơdră man pơdong giăm 330 boh sang jơnum plơi pla pơlir hăng bruă pioh kơđăp lơm ia dăo, hăng prăk tuh pơ alin giăm 600 klai prăk. Tơring čar rơkâo Kơnuk kơna djru brơi 500 klai prăk; bơnah dŏ glăi amra tŏ tui jak iâu mơng anom bơwih ƀong sĭ mơdrô hăng hơdôm khul grup, ƀing mơnuih čơmah dong.