Mơguah lơ 10/12, ƀơi Ƀrô Kơnuk kơna, khua dêh čar ơi Phạm Minh Chính git gai Jơnum kơnuk kơna hiăp bit hăng mơnuih ngă hmua Việt Nam thun 2025 hăng anăn: “Mă yua boh thâo ia rơgơi, pơplih pơčeh phrâo hăng pơplih mrô amăng mơnuih ngă hmua” hăng 150 čô mơnuih ngă hmua, anom bơwih ƀong hrŏm, anom bruă sĭ mơdrô hăng ƀing rơgơi kơhnâo. Amăng mông pơhiăp bit, Khua dêh čar hăng khua mua djop ding jum, gơnong bruă lăi glăi tơlơi tơña mơng mơnuih ƀôn sang. Khua dêh čar ơi Phạm Minh Chính rơkâo Ding jum boh thâo ia rơgơi pơhlôm brơi glông hrĭp yua măi telephôn, hơmâo apui kơtrik, dưi yua 5G, git gai djop anom bruă apui lơtrik, dăng kông pơhlôm brơi glông hrĭp mă yua hăng apui lơtrik brơi mơnuih ngă hmua kual ataih, asuek, kual giăm guai bul pơtâo, kual tơnap tap, laih dong pơtrut pơjing kơnuk kơna mrô, mơnuih mơnam mrô, mơnuih ƀôn sang mrô.

Bơdjơ̆ nao hơdră bruă sĭ mơdrô, blơi mut braih, Khua dêh čar ơi Phạm Minh Chính git gai Ding jum prăk kak; Ding jum ngă hmua hăng ayuh hyiăng gơgrong lơm nua braih pơdai trun, kơnuk kơna kơna kiăng blơi glăi mơng mơnuih ƀôn sang, laih dong pioh yua amăng dêh čar, gơgrong pok prong anih sĭ mơdrô phrâo pơ tač rơngiao, anăm brơi mơnuih ƀôn sang sư̆ rơbư̆ ƀu thâo ngă hơget.