Kiăo tui lăng ƀơi hơdôm boh sang čơ amăng plơi prong Buôn Ma Thuột anun lĕ sang čơ Tân An, sang čơ tong krah Buôn Ma Thuột, gơnam sĭ hăng mơnuih blơi gơnam tết lu biă mă. Arăng nao blơi lu hloh hơmâo sum ao, akhŏ jĕp. Hơdôm anih sĭ ƀañ kĕo, mưt ăt hơmâo pơdă djop mơta mơn. Amai Lê Thị Diễm Huyền, mơnuih sĭ gơnam ƀơi sang čơ Buôn Ma Thuột brơi thâo, amăng hrơi blan anai nua đĭ ƀơƀiă, samơ̆ ñu ăt rang kơđiăng mơn lơ̆m blơi mut gơnam:

“Thun anai ăt hơmâo djă pioh ƀiă gơnam hiam, thun anai Noel hăng tết jê̆ giăm yua anun ƀing gơmơi ăt kơđiăng lơm blơi gơnam. Bruă sĭ gơnam thun anai ăt gêh gal mơn samơ̆ aka ƀu lu đơi ôh.”

Tui amai Nguyễn Thị Nga, dŏ ƀơi phường Tân Hòa, plơi prong Buôn Ma Thuột, mơnuih ƀon sang kiăng rang kơđiăng lơ̆m blơi mut gơnam lĕ kiăng lăp djơ̆ hăng tơlơi sit nik. Yua kar hăng sang anŏ ñu, mah tết ƀơi sang čơ hơmâo lu gơnam, samơ̆ ñu ƀu blơi gơnam lu kar hăng rĭm thun:

“Kâo ƀuh gơnam tam thun anai hơmâo djop mơta, nua sĭ đĭ ƀiă pơhmu hăng thun hlâo. Kơnong kâo pô kơnong blơi gơnam kiăng hloh đôč, bơ hơdôm mơnong, añăm tam mơtah mơda giăm tết kah blơi, kâo prap lui kơnong yua amăng lơ 30, lơ 1 tết, bơ truh lơ 2,3,4,5 sang čơ pok laih, yua anun sang anŏ gơmơi ƀu hơmâo blơi pioh lui amăng hip rơ-ơ̆ lu đơi ôh.”

Ƀơi sang sĭ mơdrô prong Co.opmart Buôn Ma Thuột, ră anai gơnam sĭ amăng bơyan Tết lu biă mă; amăng anun gơnam pơkra ƀơi Việt Nam dưm dưm 95%. Yă Trần Thị Thành Nhân, kơ-iăng Khua sang sĭ mơdrô brơi thâo, thun anai, rơngiao kơ bruă ngă tui jơlan hơdră hơđong nua sĭ mơdrô, hơdôm sang sĭ mơdrô hơmâo lu jơlan hơdră pơhưč lu dong mơng anai truh pơ hrơi ƀong tết.

“Anom bruă hơmâo prap lui gơnam tam lu ƀiă pơhmu hăng hơdôm thun hlâo anun lĕ 15%, anom bruă ăt gum hrŏm hăng hơdôm anom bruă prap lui hơdôm akŏ bruă bơwih ƀong kah hăng đĭ lu tui hăng djă pioh kiăng pơhlôm brơi gơnam sĭ mơdrô djop mơta. Sang sĭ mơdrô Co.opmart lêng kơ ƀuăn ngă hơđong nua hăng trun ƀiă pơhmu hăng pơkŏn mơng 5 truh 10% laih dong hơmâo lu dong jơlan hơdră pơsur mơnuih blơi gơnam nua ƀiă kiăng hơmâo lu dong mơnuih nao blơi”.

Dak Lak ră anai hơmâo 148 boh sang čơ, 1 anih pơƀut glăi gơnam, 8 sang sĭ mơdrô prong hăng rơbêh 60 boh sang sĭ mơdrô pơkŏn. Tui ơi Lưu Văn Khôi, Khua gơnong bruă sĭ mơdrô tơring čar Dak Lak, gơnam djă pioh amăng tết thun anai đĭ giăm 56% pơhmu hăng thun hlâo.

“Gơnong bruă sĭ mơdrô ƀing gơmơi hơmâo mă bruă hăng hơdôm anom bruă pơkra pơjing hăng sĭ mơdrô, hơdôm anih blơi mut, hơdôm boh siêu thị, sang sĭ mơdrô pơprong kiăng rơkâo hơdôm anom bruă anai kơtưn amăng pơkra pơjing, sĭ mơdrô gơnam tam laih anun akŏ bruă pok pơhai hơdôm gơnam tam hăng gơgrong djă pioh gơnam tam kiăng pơhlôm sĭ mơdrô amăng hơdôm hrơi rơnuč thun kah hăng bơyan ƀong tết Quý Mão 2023”.

Tơring čar Dak Lak hơmâo rơbêh 1 klăk 800 čô mơnuih. Anom bruă bơdjơ̆ nao him lăng tơlơi kiăng amăng hrơi blan ƀong tết amra đĭ 20% pơhmu hăng rĭm pơkŏn. Yua anun, Jơnum min mơnuih ƀon sang tơring čar Dak Lak hơmâo mă yua rơbêh 1.510 klai prăk kiăng blơi gơnam pioh lui yua. Hơdôm gơnam hơmâo tơring čar Dak Lak pơsit hơđong nua sĭ mơdrô hăng djă pioh lui anun lĕ gơnam ƀong huă, mơnong (hơmâo mơnong un, mơnŭ bip, boh mơnŭ, ia mơmuă, sik, ngok hăng hơdôm gơnam, añăm tam pơkŏn dong) hăng ia săng, ia jâu. Ră anai hơmâo 10 boh anom bơwih ƀong sĭ mơdrô prong prap lui gơnam tam, ia săng ia jâu hăng giăm rơbêh 420 klai prăk.

Dong mơng anai truh hlâo hăng tơdơi hrơi ƀong tết Quý Mão 2022, anom bruă bơdjơ̆ nao tơring čar Dak Lak hơmâo nao pel ĕp, wai lăng gơnam sĭ mơdrô kiăng hmao tlôn ƀuh, pơsir hĭ khut khăt hơdôm bruă ngă soh anun lĕ đĭ nua gơnam glăk kơƀah, pơkŏng lui, sĭ mơdrô gơnam kŏm, pơkra ča čot, aka ƀu thâo anih pơkra, ƀu hơmâo tĕp anăn, sĭ dŏp gơnam tam …

Khua mua anom bruă wai lăng sĭ mơdrô tơring čar Dak Lak brơi thâo, glăk pok pơhai akŏ bruă pơgăn sĭ dŏp hăng sĭ gơnam ča čot amăng hơdôm hrơi rơnuč thun 2022 kah hăng hlâo, tơdơi tết Quý Mão. Hrŏm hăng anun, anom bruă wai lăng sĭ mơdrô hơmâo pơphun pel ĕp rơbêh 70 anom bruă hơmâo, hơdôm anih djă pioh gơnam, anih pơƀut glăi, hơdôm sang sĭ mơdrô, wŏt ƀing mơnuih sĭ mơdrô gơnam amăng plang internet…kiăng pơsir hĭ khut khăt hơdôm tơlơi ngă soh amăng sĭ mơdrô, hluai tui hơdôm hrơi rơnuč thun, giăm tết đĭ nua ča čot.