Ngă tui tơlơi pơčrâo trun mrô 05-CT/TW thun 2016 mơng Ding jum kơđi čar kơ ngă hăng hla tui hloh dong tơlơi pơmin pran jua Hồ Chí Minh, ƀơi tơring glông kual ataih Krông Bông, Dak lăk, gong gai hăng mơnuih ƀon sang hơmâo pơphun jơlan hơdră “Pơkom prăk ngă tui tơlơi Wa Hồ pơtô, djru ba sang anŏ tơnap”. Mơng jơlan hơdră anai hơmâo djru ba hơdôm boh sang anŏ hơmâo prăk pơđĭ kyar bơwih ƀong huă ƀudah hơmâo sang dŏ phrâo hiam, kơjăp hloh.

Mut nao dŏ pơ sang dŏ phrâo, amai Nguyễn Thị Diệu Linh, dŏ mă bruă ƀơi Anom bruă tơhan tơring glông Krông Bông, hok mơ-ak ră ruai, tơlơi hor kiăng hơmâo sang prong amăng lu thun jing dưi ngă laih. sang anŏ ñu tơnap lơ̆m rơkơi ñu nao mă bruă ataih, hơjăn ñu đôč dŏ pơ sang ƀrô hyu mă bruă ƀrô rông dua čô ană anet rah, lơ̆m anun hơmâo ha čô ƀu thâo hiăp hơbit tom arăng, arăng juăt iâu tự kỷ. Tơdah ƀu hơmâo gơyut gơyâo, ƀing gŏp mă bruă djru ba wơ̆t hăng 50 klăk prăk mơng Keh prăk pơkrem ngă tui tơlơi Wa Hồ pơtô yua Ping gah tơring glông Krông Bông brơi, ƀu thâo hrơi hơbin mơng dưi man pơkra sang tui anai.

“Lăng mơ-ak biă mă yơh yua hơmâo tơlơi gum djru mơng anom bruă djŏp gưl, adơi ayong amăng anom bruă, man pơkra brơi sang dŏ tui anai, kiăng hơđong pran jua mă bruă. Kâo lăng jơlan hơdră anai yôm biă mă yơh, jing kâo đăo kơnang, plai mơn glêh tơnap tui hăng mơng hlâo, djru kâo hrưn đĭ gir čem rông ană bă klă hloh”.

Ăt hok mơ-ak mơn lơ̆m hơmâo mă 20 klăk prăk mơng Keh prăk pơkrem ngă tui tơlơi Wa Hồ pơtô, amai Trần Thị Vân, dŏ ƀơi thôn 2, să Hòa Thành, tơring glông Krông Bông hơmâo pơkra pơbung sang, hăng pơbung pơging pơ anăp, brơi ană đah rơkơi ñu hơmâo anih ngui, huăi ngui dong tah amăng anŏ pơgăn anet aneo. Ăn đah rơkơi ñu jô găng drơi jăn yua duam uh kơtang, 7 thun laih samŏ kar hăng čơđai hơdôm blan đôč.

“Lu thun laih nao pơjrao pơ lu anih mơn, anun jing tơnap tap, kơƀah prăk biă mă, phrâo anai hơmâo djru ba jing kâo phôn hĭ, hơmâo prăk pơkra pơbung sang hăng man pơnăng glông ƀiă dong kiăng nô anet tơbiă ngui gah rơngiao lăng hyu anai adih. Yua ñu dŏ pơ sang na nao, rim wơ̆t kâo glăi mơng mă bruă ñu klao hok biă, sang anŏ gơmơi bơni abih pran jua".

Amai Linh hăng amai Vân kơnong jing 2 amăng hơdôm rơtuh čô mơnuih ping gah, mơnuih ƀon sang hơmâo tơlơi djru mơng keh prăk pơkŏm ngă tui tơlơi Wa Hồ pơtô ƀơi tơring glông Krông Bông. Anai jing keh prăk yua Ping gah tơring glông Krông Bông pơphun ngă mơng thun 2016. Tui anun, rim anom bruă, khul grup ping gah iâu pơthưr ƀing khua, mơnuih ping gah, mơnuih ƀon sang pơkom prăk aset biă ñu lĕ 2.000 truh kơ 20.000 prăk rim blan kiăng hơmâo prăk pơkom, djru kơ ƀing tơnap tap amăng tơring glông. Hăng bruă anai, jơlan hơdră hơmâo pơhrui glăi giăm 4 klai prăk.

Truh ră anai, Ping gah tơring glông Krông Bông hơmâo brơi 100 drơi rơmô tuh ană, djru man pơdong 14 boh sang, man pơkra sa boh sang jơnum bruă kơnuk kơna ƀơi sang hră Ea Rơt (să Čư̆ Pui), djru ba sang anŏ tơnap tap yua tơlơi truh lŏn adai ngă, sang anŏ tơnap, rin rơpa, ruă nuă...Yă Hồ Thị Thảo, Kơ-iăng khua Anom pơtô bruă Ping gah tơring glông Krông Bông brơi thâo, jơlan hơdră jing bruă ngă sit nik hrăm hăng ngă tui tơlơi pơmin mơng Wa Hồ, kiăng tơlơi pơčrâo trun mrô 05 mơng Ding jum kơđi čar hơmâo abih bang mơnuih ƀon sang thâo. Amăng mông pơphun ngă, tui hluai kơ thun blan mơn, Khul khua git gai Ping gah tơring glông pơsit pô dưi hơmâo tơlơi djru brơi čan prăk. Keh prăk hơmâo mă yua djơ̆, rơđah rơđông, djơ̆ pô kiăng čan. Yua hnun, jơlan hơdră anai hơmâo lu mơnuih ƀon sang, ƀing khua, mơnuih ping gah tŭ ư, gum ngă.

“Amăng hrơi blan pơ anăp, sem lăng jơlan hơdră anai kiăng klă hloh đah mơng djru ba mơnuih tơnap tap pơ tơring glông. Him lăng tơdơi kơ brơi prăk čan mơng keh prăk lĕ akŏ blan 7/2023 Anom pơtô bruă Ping gah amra pơthâo brơi Ping gah pok pơhai jơlan hơdră pơkom prăk phrâo čơkă hrơi Jơnum ruah khua ping gah djŏp gưl thun 2025-2030”.

Ƀu kơnong djru ngă sit nik tơlơi pơčrâo trun mrô 05 mơng Ding jum kơđi čar truh kơ abih bang mơnuih ƀon sang đôč ôh mơ̆, Jơlan hơdră Pơkom prăk ngă tui tơlơi Wa Hồ ƀơi Krông Bông ba glăi boh than sit nik, hơmâo djru lu mơnuih. anai jing bruă ngă yôm biă, kiăng mơnuih ƀon sang gum djru, bang hyu bruă ngă hiam amăng bruă hrăm hăng hla tui tơlơi pơmin pran jua Hồ Chí Minh, ngă brơi tơlơi hơdip anai jai hrơi klă hiam hloh.