Đĭ pơhiăp amăng mông mă bruă, Khua mir sir ơi Lương Cường pơpŭ hăng lăng yôm Khul pơphô bruă gơnong glông hơmâo gum hrŏm kjăp hăng hơdôm anom bruă kơsem min, pơgiong črăn tơlơi pơkă mơ-it nao Ding jum kơđi čar sem lăng mă yua; laih dong rơkâo tŏ tui gơgrong gum hrŏm, pơphô bruă, prap lui klă boh tơhnal kơ jơnum blung a mơng Khul git gai tơdơi kơ ding jum kơđi čar pơsit pok khul git gai.

Khua mir sir rơkâo Khul pơphô bruă gơnong glông đing nao pơphô bruă pơjing jơlan hơdră yôm phun amăng bruă mă truh abih rơwang mă bruă, djru brơi Khul git gai dưi črâo ba bruă mă tong ten, ngă pơgiong tui hơdôm bruă jao, hơdră bruă pơplih pơkra phiah phiăn tui tơlơi pơsit kơ tŏ tui bruă pơjing hăng pơgiong Kơnuk kơna tui hơdră xã hội chủ nghĩa Việt Nam amăng rơwang phrâo.