Lu đơ đam lŏn dŏ, lŏn ngă bruă sĭ mơdrô-bơwih bơwang dưi pơsit hlâo adih ƀơi plơi prong Ƀuôn Ma Thuôt tơring čar Dak Lak, ră anai jing lŏn ngă hmua ƀudah lŏn pioh pơgang glai, lŏn pơgang pioh kyâo pơtâo mơ̆ bơbeč djơ̆ hĭ bruă man pơdong ngă sang măi, pơkra ming sĭ mơdrô mơ̆ng lu sang bruă sĭ mơdrô. Ƀơi mông bưp bơkơtuai hăng nai rai plah wah Khua Jơnum min mơnuih ƀôn sang plơi prong hăng ƀing khua sang bruă sĭ mơdrô dưi pơphun lơ 27/11, Lu mơnuih ngă bruă mơdrô lăi pơthâo tơlơi anai, kiăng khua mua jơnum min mơnuih ƀôn sang plơi prong Ƀuôn Ma Thuôt hơmâo hơdră pơsir brơi tañ kiăng hơđong anih pơkra ming gơnam sĭ mơdrô, hơmâo akŏ bruă tuh pơ alin djơ̆ lăp.

Ƀing sĭ mơdrô lăi lĕ anŏ pơblih bruă yua lŏn amăng hră rek link pơkă anih dŏ plơi prong hơmâo lu anŏ pơkơđai nao rai hăng tơhnal pơkă hơđăp. Lăi glăi tơlơi anai, ơi Vũ Văn Hưng, Khua Jơnum min mơnuih ƀôn sang plơi prong Ƀuôn Ma Thuôt, tơring čar Dak Lak ăt pơhaih mơ̆n anŏ ƀu găl yua aka ƀu thâo hluh kơ bruă pơkă hơnơ̆ng, rek link pơkă anih dŏ hăng lŏn ngă hmua pla kyâo đôč, bruă pơkă hơnơ̆ng aka ƀu djơ̆, anun lĕ ƀing pơkă hơnơ̆ng rek ling aka ƀu hyu ĕp lăng abih djop anih, ba truh bruă pơkă hơnơ̆ng soh glăi. Hơdră či pơsir tơlơi kơƀah anun, ơi Vũ Văn Hưng brơi thâo: plơi prong hlăk čih ming pơkra rĭ glăi brơi găl kơ abih bang amăng plơi prong, sit ngă giong laih bruă pơkă hơnơ̆ng hrŏm abih bang amra dăp glăi djơ̆ lăp, jao glăi hơdră yua lŏn djơ̆ tui tơlơi kiăng mơ̆ng mơnuih ƀôn sang hlâo adih.