Pơhiăp ƀơi mông jơnum, Khua dêh čar ơi Phạm Minh Chính hơmâo kah pơpha kơ gru grua phun ngă giăng mah Việt Nam hăng Mi, khua dêh čar lăi, ñu hok mơak ƀuh tơlơi rô nao rai Việt Nam hăng Mi jai hrơi pơđĭ kyar klă hiam, amăng anun hơmâo tơlơi djru hrŏm prong mơ̆ng djop sang bruă sĭ mơdrô dêh čar Mi.

Tui hăng khua dêh čar, Việt Nam ăt pơtrut kơtang pơblih phrâo bruă mă sĭ mơdrô tui anăp ngă jơlan hơdră hơđong, jai hrơi amuñ gêh găl, tơpă, djơ̆ hơnơ̆ng tui tơlơi phiăn jar kmar, gir run prăp lui djop anŏ gêh găl hăng ngă brơi amuñ djru djop sang bruă tuh pơ alin mơ̆ng jar kmar, amăng anun ƀing ngă bruă sĭ mơdrô mơ̆ng dêh čar Mi; rơkâo kơ dêh čar Mi lui hĭ ngă gun, kom hăng Việt Nam, tañ tŭ yap hĭ tơlơi phiăn pơkă anih sĭ mơdrô kơ Việt Nam, ngă gêh găl brơi dua bơnah dêh čar, sang bruă sĭ mơdrô dua bơnah ngă hrŏm pơđĭ kyar, yua anŏ tŭ yua hrŏm mơ̆ng dua bơnah, mơnuih ƀôn sang dua boh dêh čar.