Thun hrăm anai Sang hră gưl dua Võ Thị Sáu ƀơi să Krông Na, tơring glông Buôn Đôn hmâo 349 čô čơđai sang hră, amăng anun hmâo 80% mrô čơđai lĕ djuai aniă ƀiă. Yua kơ sang anô̆ tơnap tap, lu amĭ ama čơđai amra brơi ană pơdơi sang hră pioh dô̆ pơ̆ sang nao ngă hmua djru sang anô̆. Adơi Y Jun Su Byă, čơđai anih 9B, Sang hră gưl dua Võ Thị Sáu, tơring glông Buôn Đôn, tơring čar Daklak brơi thâo:

 “Sang anô̆ tơnap tap anun kâo khom pơdơi sang hră lu pioh nao mă bruă. Tơdơi kơ dưi hmâo nai pơsur kâo gir run nao hrăm tum djop”.

Tui hăng anun, ƀơi Sang hră gưl sa Y Jŭt, să Krông Na, tơring glông Buôn Đôn, kiăng djă pioh mrô čơđai nao hrăm lĕ tơlơi ƀu amuñ ôh. Nai Nguyễn Tiến Chung, nai pơtô ƀơi Sang hră gưl sa Y Jŭt, brơi thâo, bruă pơsur čơđai sang hră nao hrăm hră lĕ sa amăng hơdôm bruă mă yôm pơhăn nao hrom hăng bruă pơtô pơblang. Lom hmâo čơđai sang hră pơdơi, nai wai lăng anih hrăm gum hrom hăng grŭp apăn bruă Sang hră nao tơl sang bưp amĭ ama čơđai hăng čơđai sang hră pioh thâo tơlơi, tơlơi pơmin, tơlơi čang rơmang hăng pơsur čơđai pơwot glăi sang hră:

 “Rơgao kơ lăi pơhing lĕ hơdôm hrơi blung a ƀing čơđai nao hrăm glăi klă mơn, samơ̆ hơdôm hrơi tơdơi hmâo sa dua mông dong rơkut dong lĕ ƀing gơmơi glăi hyu pơsur dong. Hơdôm hrơi hơpă ƀing čơđai pơdơi lu hă glăi hyu pơsur dong”.

Tui hăng nai Trần Thị Hằng, Kơ-iăng Khua Sang hră gưl sa Y Jŭt, să Krông Na, tơring glông Buôn Đôn, bruă mă tơnap tap hloh ƀu djơ̆ pơtô pơhrăm ôh mơ̆ jing djă pioh mrô čơđai nao hrăm. Hrơi tơđar tơnap laih, truh blan 11 blan 12 dô̆ tơnap hloh dong lom truh bơyan pĕ kơ phê, ƀing čơđai pơdơi sang hră kiăo tui amĭ ama nao pĕ kơ phê apah. Ƀing nai khom hyu tơña bla, hrơi mlăm nao tơl đang kiăng ĕp čơđai sang hră.

 “Pơsur čơđai sang hră lĕ khom nao amăng mlăm mơmot, năng ai ñu 7h30 truh kơ 8 mông mơmot anun kah mơng bưp sang anô̆. Ană bă djơ̆ anô̆ ñu dô̆ glăi hăng amĭ ama pơ̆ đang hlao, ƀing gơmơi khom run nao mơn. Khua sang hră, Kơ-iăng Khua Sang hră, khul mut phung, grŭp, nai wai lăng anih hrăm khom gum hrom nao pơ̆ đang kiăng pơsur čơđai sang hră pơwot glăi sang hră”.

Glêh glar lĕ tui anun, samơ̆ lom ƀing čơđai pơwot glăi anih hrăm, ƀing nai ƀuh mơ-ak biă. Yua kơ ƀing nai thâo hăng hơdôm kual ƀun rin tơnap tap kah hăng kual guai dêh čar Buôn Đôn, kiăng hrưn đĭ tơtlaih mơng ƀun rin ƀu hmâo jơlan hơdră pơkon lĕ hrăm hră, hmâo bôh thâo amra pơplih tơlơi pơmin, pơplih tơlơi hơdip mơda. Nai Phạm Thị Loan, Kơ-iăng Khua Sang hră gưl dua Võ Thị Sáu, ƀơi să Krông Na, tơring glông Buôn Đôn lăi pơthâo:

“Tơlơi hơdip mơda ƀơi plơi pla ta, să ta bơwih ƀong tơnap tap, lŏn drŏn krô kreñ biă ñu gơnang kơ bơyan hơjan kah mơng dưi tơjŭ pla samơ̆ pơhrui glăi lĕ hluai tui ayuh hyiăng. Tui anun ră anai ƀing čơđai khom hmâo bôh hră tơdơi anai mơng djru kơ ƀing čơđai hmâo tơlơi čang rơmang hloh”.

Hrom hăng bruă pơsur cơđai sang hră nao hrăm hră, hơdôm bôh sang hră ƀơi să kual guai dêh čar Krông Na, tơring glông Buôn Đôn hmâo iâu pơhrui khul mơnuih mơnam kiăng djru čơđai sang hră ƀun rin gah hơdrôm hră, hră čih, gơnam mă yua hrăm hră, rơdêh nao rai... Gơnang kơ hơdôm tơlơi pơsur gah gơnam tam hăng pran jua, lu čơđai sang hră ƀơi kual guai dêh čar kiăo tui dong tơlơi čang rơmang nao sang hră./.