Tơdơi kơ 4 thun ngă bruă pơkra kleng keh ô tô ƀơi tơring čar Bình Dương, ayong Nguyễn Văn Việt, să Ea Na, tơring glông Krông Ana hmâo pơsit pơdơi bruă pioh ĕp tơhnal bruă mă pơkon. Hmư̆ hing hmâo mông lăi pơthâo bruă mă dưi pơphun ƀơi tơring glông, ayong Việt hmâo nao laih pioh hơduah ĕp lăng. Tơdơi kơ hmư̆ tơlơi lăi pơthâo hăng tŭ mă tơlơi pơhing ruah mơnuih mă bruă ƀơi hơdôm bôh dêh čar Hàn Quốc, Đài Loan, Japan, ayong Việt hmâo nô̆p laih hră pơ-ar nao mă bruă pơ̆ dêh čar Japan. Ñu pơmin, hăng tơlơi găn rơgao 4 thun mă bruă mơng pô amra dưi ngă bruă ƀơi Japan hăng anai ăt jing tơhnal pioh ñu pơđĭ kyar drơi pô hăng pơđĭ tui prăk pơhrui glăi.

“Hlâo kơ nao pơ̆ anih ngă hră mă bruă ƀơi tơring glông Krông Ana kâo ăt hơduah ĕp lăng mơn kơ nao mă bruă pơ̆ dêh čar arăng. Anai ăt lĕ tơlơi čang rơmang pioh pơđĭ kyar drơi pô hăng hmâo prăk pơhrui glăi kơ sang anô̆. Dưi ƀing amai ƀơi Anom lăi pơthâo brơi kâo ăt hơduah ĕp lăng tŏng ten mơn kơ tơlơi ruah mă sang bruă pioh pô mă bruă. Kâo hmâo pơsit tui bruă anung kleng keh rơdêh ƀơi Japan”.

Phrâo pơwot glăi tơdơi kơ 2 thun nao ngă tơhan, ayong Lê Anh Nam ƀơi thôn 2, să Quảng Điền ăt tañ ĕp truh anih bơwih kơ bruă mă kiăng ĕp lăng bruă mă kơ pô. Tơdơi kơ dưi lăi pơthâo kơ hơdôm hơdră bruă pioh kơ pơtô pơhrăm bruă mă hăng bruă mă kơ hlăk ai ngă giong bruă ling tơhan pơwot glăi plơi ayong Nam hmâo pơsit nao hrăm mơgăt rơdêh pioh ĕp bruă mă djơ̆ kơ pô:

   “Ră anai kâo phrâo glăi mơng ngă tơhan, anun hmâo jơlan hơdră lăi pơthâo tơlơi pơhing pioh kơ Ling tơhan phrâo ngă giong bruă lĕ kâo ăt gum hrom mơn, ƀơi anai hmâo hơdôm tơlơi pơhing djơ̆, sit nik hăng kâo ăt hơduah ĕp lăng mơn bruă kơ pô amăng tơlơi hơdip klă hloh. Ƀơi anăp kâo nao hrăm mơgăt rơdêh hăng hơdră pơkra rơdêh ô tô tơdơi kơ anun nao mă bruă”.

Tui hăng ơi Y Thắng B’đap, Kơ-iăng Khua Khul mơnuih ngă đang hmua tơring glông Krông Ana, ră anai đơ đam tơring glông hmâo năng ai ñu 58% mrô mơnuih ƀôn sang amăng hnưr thun mă bruă. Kiăng djru mơnuih mă bruă thâo dưi lăi pơhing sit nik kơ ruah mơnuih mă bruă, Khul mơnuih ngă đang hmua hmâo gum hrom hăng Anom bơwih brơi kơ bruă mă tơring čar pơphun hơdôm mông ngă hră pơ-ar bruă mă ƀơi tơring glông hăng hơdôm bôh să hmâo lu mơnuih amăng hnưr thun mă bruă, samơ̆ akă dưi ĕp bruă mă djơ̆. Bruă ba hơdôm mông lăi pơthâo bruă mă nao tơl plơi pla amra djru mơnuih mă bruă hmâo lu tơlơi ruah mă bruă lăp djơ̆, djru ngă hrŏ trun mrô mơnuih ƀu hmâo bruă mă, djru mơnuih mă bruă hmâo bruă mă hăng prăk pơhrui glăi hơđong tơdơi kơ Tết.

 “Khul mơnuih ngă đang hmua tơring glông ngă glông tô nao rai dong kơ Anom, brơi kơ hơdôm bôh anom bơwih ƀong kiăng ngă hiưm hơpă hmâo, iâu pơthưr pơsur mơnuih amăng khul hnưr thun mă bruă kiăng kơ bruă mă kiăng juăt hăng hơdôm bruă mă, djru lăi pơthâo bruă mă kiăng gơñu thâo hơdră bruă mơng kơnuk kơna pioh kơ bruă djru ƀing mơnuih mă bruă kiăng mă bruă ƀơi tơring čar, hăng tơring čar pơkon ƀudah nao mă bruă pơ̆ dêh čar arăng tui gơnong bruă sit. Hrom hăng anun Khul mơnuih ngă đang hmua tơring glông gum hrom hăng Sang prăk gah hơdră bruă pioh djru dong prăk pioh čan nao mă bruă pơ̆ dêh čar tač rơngiao”.

Ơi Nguyễn Văn Cường, Kơ-iăng Khua Anom bơwih brơi bruă mă tơring čar Daklak brơi thâo, amăng thun 2023, Anom hrưn đĭ lăi pơthâo bruă mă brơi năng ai ñu 10 rơbâo čô mơnuih mă bruă, mrô mơnuih nao mă bruă rơbêh kơ 3.000 čô mơnuih hăng nao mă bruă pơ̆ dêh čar tač rơngiao năng ai ñu 1.500 čô mơnuih. Kiăng dưi ngă tơlơi anai, amăng thun 2023 Anom amra pơphun năng ai ñu 60 mông bơwih brơi kơ bruă mă ƀơi hơdôm anih anom hăng năng ai ñu 10 mông bơwih brơi kơ bruă mă tui akô̆ bruă ƀơi Anom. Rơngiao kơ anun amra gum hrom hăng Gơnong bruă pơtô pơhrăm pơphun hơdôm mông lăi pơthâo bruă mă kơ čơđai sang hră anih 12. Hơdôm mông lăi pơthâo bruă mă ăt amra dưi pơplih tui jơlan gah nao giăm hăng mơnuih mă bruă hloh:

 “Akô̆ thun 2023 tơlơi kiăng mơng hơdôm anom bơwih ƀong rơkâo tui Anom lu biă, kiăng djơ̆ hăng bruă pơsir djru hơdôm anom bơwih ƀong ruah mơnuih mă bruă lĕ Anom amra pơtrut kơtang abih bang hơdôm hơdră gah Jơlan hơdră bruă mă, biă ñu pơplih hơdră lĕ Anom pơphun nao tơl plơi pla, đa lĕ pơphun amăng mlăm mơmot, hrơi năm hrơi tơjuh mơtăm tui tơlơi kiăng mơng plơi pla hăng biă ñu thun 2023 anai Anom pơtrut kơtang gum hrom ƀơi hơdôm mông Jơnum ngui mơng hơdôm tơring glông plơi prong kiăng lăi pơhing kơ neh wa thâo rơđah ăt kah hăng lu mơta bôh yôm amăng hơdôm mông jơnum ngui, bĕ djơ̆ tơlơi arăng hyu plư mă ča lom hyu mă bruă”.

Ăt tui hăng ơi Nguyễn Văn Cường mơn, Daklak ră anai hmâo năng ai ñu 600 bôh anom bơwih ƀong ƀơi tơring čar glăk hmâo tơlơi kiăng ruah mơnuih mă bruă, lu anom bơwih ƀong tơring čar pơkon ăt glăk lăi pơthâo mơn hăng Anom bơwih brơi kơ bruă mă tơring čar kiăng rơkâo ruah mơnuih mă bruă mơng Daklak nao mă bruă pơ̆ tơring čar pơkon. Anom ruah ƀiă mă ñu 200 čô mơnuih hăng lu biă ñu lĕ 5 rơbâo čô mơnuih. Anai lĕ tơhnal prong pioh mơnuih mă bruă Daklak ĕp bruă mă kơ pô./.