Dong mơng thun blung a ngă tui jơlan hơdră pơtô pơhrăm thun 2018, tơring čar Daklak lĕ sa amăng hơdôm anih anom bơbeč kơtang yua kơ klin Covid-19. Kah hăng abih bang hơdôm hrơi anun, čơđai khom hrăm lăng nao rai mơng ataih. Yua anun, amăng thun hrăm tô̆ tui, hơdôm bôh sang hră khom rơngiă lu mông pioh ngă hơđong glăi bruă pơhrăm kơ čơđai, hrom hăng anun bruă pơphun kơčăo bruă pơtô hăng pơhrăm djơ̆ hăng jơlan hơdră pơtô pơhrăm phrâo. Ơi Phạm Xuân Mỹ, Khua Sang hră đom lom djop djuai ania ƀiă gưl 2 tơring glông Krông Pač, brơi thâo:

 “Bơdjơ̆ nao bruă mă lĕ khom pơjing tơlơi pơhrăm pơhmu nao, tơlơi anai sang hră hmâo črâo ba hơdôm khul juăt bruă bơkơtuai tŭ ư hrom ruah mă tơlơi pơtô pơhrăm pơhmu nao kơsem min hơdôm jơlan hơdră hrăm tui tơlơi hrăm mơ̆ hơdrôm hră pơhrăm ƀudah hơdôm hră pơ-ar phrâo rơkâo”.

Sa amăng hơdôm tơlơi rơkâo lom pok pơhai jơlan hơdră pơtô pơhrăm phrâo lĕ pơphun hrăm mơguah čơtlăm sa hrơi, biă ñu lĕ hăng gưl sa. Tui anun mơn, lu anih anom amăng tơring čar Daklak ăt dô̆ mơn tơlơi kơƀah sang hră, anih hrăm, gơnam mă yua pơtô pơhrăm akă ha amăng plĕ tui tơlơi rơkâo. Nai Hoàng Thị Cúc, nai pơtô gưl sa Trần Quốc Toản, tơring kual Ea Pốc, tơring glông Čư̆ Mgar brơi thâo:

 “Amăng pơhrăm hmâo gơnam djop tum kơ ƀing nai, bơ̆ ƀơi anai ƀing nai đah kơmơi ƀu hmâo ôh. Ƀing nai kơnong kơ pơtô sôh sel đôč, lăng nao amăng hơdrôm hră ba hơdrôm hră đĭ kiăng čơđai lăng nao amăng anun hrăm đôč. Yua anun sa mông hrăm tui anun mơng 3-4 bôh hră čơđai phrâo hrăm bôh hră anai laih anun truh bôh hră pơkon tơnap biă kơ ƀing čơđai pioh ƀing čơđai pơhrăm lĕ ƀing nai pơtô ƀu hmao ôh”.

Hrom hăng anun, tơlơi kơƀah nai pơtô ƀơi sa dua bit anih ăt glăk jing anô̆ gun hăng gơnong bruă pơtô pơhrăm Daklak. Bruă pơtô hơdôm mơta tơlơi hrăm tum pơƀut pơ ala kơ yua kơ ha jăn tơlơi hrăm kah hăng hlâo abih ăt ngă nai pơtô luk puk mơn, biă ñu nai pơtô gưl dua. Ơi Phạm Ngọc Lĩnh, Khua sang hră gưl dua Ea Tu, să Ea Tu, plơi prong Buôn Ma Thuột, tơring čar Daklak brơi thâo:

 “Nai pơtô mơng sang hră dô̆ kơƀah, yua anun sa dua mơta tơlơi hrăm pơpha dô̆ tơnap. Dua lĕ, hơdôm tơlơi hrăm tum pơƀut bơhmutu ñu kah hăng tơlơi hrăm khoa học tự nhiên lĕ ră anai akă hmâo nai pơtô hơnong tơlơi anai ôh mơ̆, khom ngă tui bruă pơtô pơhrăm mơng 3 čô nai tum pơƀut pơtô amra lĕ nai pơtô hoá học, lịch sử, sinh học ăt kah hăng tơlơi hrăm lịch sử, địa lý lĕ ră anai akă hmâo nai pơtô hnong tơlơi hrăm anai ôh mơ̆ khom hmâo dua čô nai pơtô ƀudah nai pơtô lịch sử pơtô địa lý ƀudah nai pơtô địa lý pơtô lịch sử”.

Tui hăng Gơnong bruă pơtô pơhrăm tơring čar Daklak, ră anai đơ đam tơring čar dô̆ kơƀah 1.200 čô nai, mơnuih mă bruă tui tơlơi pơkă; mrô anih anom hrăm khom pơdŏng phrâo djơ̆ hăng tơlơi rơkâo hrăm hră mơguah čơtlăm sa hrơi lĕ giăm truh 500 bôh anih. Hơdôm tơlơi kơƀah anai hmâo bơbeč truh prong biă rơnoh bruă ăt kah hăng anô̆ kơjăp bruă ngă tui jơlan hơdră pơtô pơhrăm thun 2018 mơng tơring čar. Hơdôm bôh sang hră khom bơwih mă anih hrăm gơnam mă yua, măi mok pơtô pơhrăm, nai pơtô./.