Ƀing pô anom anai pơblang, bôh than ba truh tơlơi anai lĕ yua kơ kmlai ƀiă, lup lăp hăng mrô ia xăng ia jâu ƀiă. Tui hăng tơlơi hơduah ĕp bôh nik ñu mơng pô hyu mă tơlơi pơhing phrâo, lơ 31/1, anun lĕ lơ 10/1 blan di Quý Mão, kơnong kơ rôk tui jơlan Hồ Chí Minh črăn găn plơi prong Buôn Hồ, hmâo laih 2 bôh anom sĭ ia xăng ia jâu lĕ “Appollo Oil mrô 8” gah Sang bruă bơwih ƀong mơnuih ƀôn sang Hoàng Nam hăng Sang sĭ ia xăng ia jâu “Hồng Quý 1” yôl hnal čih abih ia xăng, ia jâu.

Rôk tui jơlan mrô 29, črăn găn să Tân Lập, tơring glông Krông Ƀuk, hmâo anih sĭ ia xăng ia jâu Rồng Vàng ăt yôl hnal lăi abih ia xăng ia jâu mơn hăng pơdơi sĭ. Tui hăng Anom wai lăng bruă sĭ mơdrô Daklak, anom hmâo thâo laih tơlơi pơhing sa dua anom sĭ ia xăng ia jâu ƀơi tơring glông Krông Ƀuk hăng plơi prong Buôn Hồ abih ia xăng ia jâu, yôl hnal lăi pơdơi sĭ mơdrô./.