Să guai dêh čar ƀơi Ia Lốp dưi pơdŏng thun 2006 tui hơdră pơtrun rit đuăi mơnuih ƀôn sang pơđĭ kyar bơwih ƀong phrâo mơng Binh đoàn 16 – Ding jum khul ling tơhan ră anai lĕ Grŭp bơwih ƀong Pơgang lŏn ia 737, Quân khu 5; mrô mơnuih ƀôn sang ră anai mơng să năng ai ñu 6.600 čô mơnuih, hăng 15 djuai ania dô̆ hơdip mơda hrom. Amăng hơdôm thun rơgao, să Ia Lốp hmâo gum hrom kơjăp laih hăng hơdôm ƀirô, grŭp gơnong bruă, hơdôm khul ling tơhan mă bruă ƀơi să, biă ñu Puih kơđông pơgang guai dêh čar 735, Grŭp bơwih ƀong pơgang lŏn ia 737 hăng Kông ang tơring glông Ea Sŭp ngă klă bruă djă pioh hơđong amăng plơi pla, bruă abih bang mơnuih ƀôn sang pơgang lŏn ia gum hrom, pơgang rơnuk rơnua plơi pla lŏn ia.

Amăng rơwang “Hrơi jơnum abih bang mơnuih ƀôn sang pơgang lŏn ia”, ƀơi să Ia Lốp hmâo pơphun laih lu bruă mă tŭ yua kah hăng: pơphun pel ĕp tơlơi ruă, pha brơi jrao, bơwih brơi tơlơi suaih pral rơbêh kơ 500 čô mơnuih ƀôn sang; ƀơk sa bôh sang dô̆ “pơđao ƀơi guai dêh čar”; ƀơk 10 bôh rơdêh dang wang kơ ƀing čơđai sang hră tơnap tap; giăm truh 30 anung gơnam kơ khua git gai ping gah, khua grŭp wai lăng mă pô, mơnuih hmâo arăng hmư̆ tui lu, mơbruă amăng bruă abih bang mơnuih ƀôn sang pơgang guai dêh čar, rơnuk rơnua plơi pla./.