Anun lĕ sa amăng hơdôm tơlơi rơkâo mơ̆ Jơnum min mơnuih ƀôn sang tơring čar Daknông črâo ba kiăng pơtrut tañ rơnoh bruă pơsir prăk yua kơ bruă hrom. Thun 2023, abih bang prăk yua kơ bruă hrom ƀơi tơring čar Daknông lĕ 3.473 klai prăk. Truh rơnuč blan 2, đơ đam tơring čar hmâo pơsir laih năng ai ñu 185 klai prăk, hmâo rơbêh kơ 5% kơčăo bruă. Kơnong hăng hơdôm jơlan hơdră pơkă mơng lŏn ia thun 2023 hmâo abih bang prăk yua giăm truh 1.120 klai prăk ăt akă dưi pơsir mơn. Mrô prăk mă mơng hơdôm jơlan hơdră pơkă mơng lŏn ia thun 2022 lĕ 758 klai prăk, tơring čar phrâo pơsir mă 17%.

Amăng mông jơnum pơtrut pơsir prăk mă yua kơ bruă hrom phrâo anai, ơi Hồ Văn Mười, Khua Jơnum min mơnuih ƀôn sang tơring čar Daknông rơkâo hơdôm bôh tơring glông, plơi prong, hơdôm gơnong bruă khom gơgrong hlâo, pơplih tañ, pơčeh phrâo amăng ngă tui, na nao gum hrom, gum hrom kơjăp kiăng pơsir ngăn rơnoh djơ̆ bôh than, djơ̆ rơnoh bruă. Truh lơ 30/6/2023, hơdôm rơwang bruă akă pơdŏng, akă pơsir ngăn drăp thơ rơkâo pơplih ngăn drăp kơ hơdôm rơwang bruă pơkon ngă tui klă, hrưn đĭ truh rơnuč thun 2023 pơsir hmâo rơbêh kơ 95%./.