Dơnao ia Tà Đùng – dơnao ia pơkĕ apui lơtrik Đồng Nai 3, ƀơi tơring glông Dăk Glong, tơring čar Daknông lĕ, anih dô̆ hơdip mơda mơng hơdôm rơtuh bôh sang anô̆ hơdip hăng bruă rông akan amăng gruh, mă akan hăng dlông dơnao ia hăng ba tuai hyu čuă ngui, tuai hyu čuă lăng hăng dlông song. Amăng hlung ia ră anai hmâo 6 anih anom rông akan, rim anih anom tum pơƀut năng ai ñu 4-5 bôh sang anô̆. Dưi hmâo khul apăn bruă pơtă pơtăn, pơtô brơi ngă tui tơpă hơdôm bruă pơhlôm klă kiăng pơgang hlôm hlâo tơlơi ia ƀlung, pơgang ia hăng dlai tlô, ơi Bùi Văn Điệp, pô rông akan amăng gruh hăng dlông ia Tà Đùng hmâo 3 thun rơgao, lăi pơthâo:

 “Rông akan blung hlâo ta khom rơnăk agaih ia, djop mơta bruă khom rơnăk hơdjă. Bơ̆ pơhlôm ƀơi jơlan nao rai lĕ kâo ăt khom pơhlôm mơn, bơhmutu ñu kah hăng čut ao pông kơ su, tơdah hmâo tơlơi hơget thơ ăt gal kơ pô mơn. Bơ̆ dlai tlô lĕ, ƀơi anai arăng ăt lăi pơthâo na nao mơn, kâo ƀu koh kyâu ôh, yua kơ anai lĕ kual dlai lŏn ia, kual pơgang pơhlôm”.

Hrom hăng 6 anih anom rông akan amăng gruh, Dơnao ia Tà Đùng dô̆ hmâo 3 anih jưh ƀat tô song nan rơkâo mă yua čơkă tuai hyu čuă ngui. Grŭp pơhlôm jơlan nao rai tơring čar Daknông hmâo pơphun pel ĕp ngă hră laih, pơsit hră mă yua ƀat tô, hơdôm mơta măi mok pơhlôm klă kah hăng ao pông kơ su, pơgang huĭ hmâo tơlơi truh, măi mok pơgang pơgăn apui ƀong... Ơi Trần Quốc Long, Khua sa Sang bruă wai lăng anih tuai čuă ngui ƀơi anai, brơi thâo:

 “Hơdôm prăk pran mơng ƀing gơmơi dưi nao pơhrăm, dưi pơsit hră mơgăt ƀat tô pơgiăng tuai čuă ngui. Hăng ƀing mă bruă dưi pơhrăm bruă wai lăng tuai čuă ngui yua kơ Gơnong bruă wai lăng tuai čuă ngui Daknông pơphun. Ƀing gơmơi ăt čang rơmang mơn Jơnum min mơnuih ƀôn sang tơring car hăng hơdôm gơnong bruă ngă gal brơi kơ anom bơwih ƀong amăng kual Tà Đùng lĕ dưi pơphun anih pơhrăm pơsit hră mă bruă kiăng djop mơnuih dưi ngă juăt hăng pơđĭ tui bôh thâo mơng pô pioh bơwih kơ tuai”.

Tui hăng mrô yap mơng ƀirô apăn bruă, ƀơi dơnao ia Tà Đùng – drai pơkĕ apui lơtrik Đồng Nai 3 hăng 4 (tơring glông Dak Glong) hmâo 34 bôh song tuai hyu čuă ngui, rơkĭ hăng song măi glăk mă yua. Rơgao kơ pel ĕp, khul apăn bruă thâo hmâo sa bôh anom bơwih ƀong hmâo 4 bôh song tuai čuă ngui leng kơ abih hrơi mă yua. Rơngiao kơ anun, dô̆ hmâo lu song nan, ƀat tô akă ngă hră pơsit. Tui hăng ơi Lê Đình Hải, Kơ-iăng Khua Anom wai lăng măi mok song nan hăng mơnuih mơgăt – Gơnong bruă wai lăng dŭ pơgiăng jơlan nao rai Daknông, anai lĕ tơlơi tơnap pơsir hăng plơi pla lom hmâo lu ƀat tô song lĕ gơnam pong pơkra mă, ƀu djop tơlơi ngă hră mă yua:

 “Gơnong bruă dŭ pơgiăng jơlan nao rai ăt gum hrom na nao mơn hăng hơdôm ƀirô mă yua bơdjơ̆ nao kơtưn bruă lăi pơhing, pơtrut pơsur mơnuih ƀôn sang pơsir hơdôm măi mok ƀu djop tơlơi pơkă mă yua kiăng pơphun ngă hră pơsit, ngă hră mă yua tui tơlơi pơkă. Hrom hăng anun, ƀirô ngă hră lĕ Anom pơsit hră mă yua mrô 5 ƀơi Nha Trang ăt gum hrom klă mơn hăng plơi pla pơtô brơi na nao kơ mơnuih ƀôn sang, samơ̆ hơdôm mơta ƀat tô song nan anai pong pơkra mă pô tui tơlơi găn rơgao mơng đưm, ƀu hmâo hră pơ-ar čih pioh anun ƀu djop tơlơi pioh ngă hră pơsit mă yua”.

Hrom hăng bruă pơtô brơi mơnuih ƀôn sang ngă tui hră pơsit, ngă hră mă yua song nan tui tơlơi pơkă, ƀơk ao pông kơ su kơ hơdôm sang anô̆ rông akan amăng dơnao ia hăng dô̆ hơdip mơda kơtuai hang dơnao ia, hơdôm gơnong bruă wai lăng tơlơi anai ƀơi Daknông ăt na nao mơn pel ĕp, lăi pơhing, pơtă pơtăn pơhlôm klă kơ hơdôm bruă mă ƀơi dơnao ia Tà Đùng. Kiăo tui anun rơkâo pô song nan, ƀat tô pơgiăng tuai hyu čuă ngui ƀu pơgiăng rơgao kơ rơnoh pơkă, rơgao mrô mơnuih pơkă; jưh ƀat tô song nan djơ̆ anih anom pơkă; rơkâo mơnuih hyu čuă ngui čut ao pông kơ su lom rô nao rai hăng dlông dơnao ia...

Dưi lăng lĕ Tŏng Ving Hạ Long hăng dlông čư̆ Dăp Kơdư, samơ̆ bruă tuai čuă ngui ƀơi Dơnao Tà Đùng ăt dô̆ hơnong mơn hăng pơphun mă pô. Khă truh ră anai akă hmâo tơlơi truh hơpă hai, tuai čuă ngui Tà Đùng kiăng pơphun wai lăng kơjăp mơn hăng hmâo akô̆ tlôn kiăng pơhlôm klă hloh kơ tuai čuă ngui.

Hlâo kơ Tết tui phiăn juăt Quý Mão, Khua dêh čar ta hmâo laih kông điêng kơ pơhlôm hơđong, pơhlôm klă ƀơi jơlan nao rai amăng tal Tết. Amăng anun, Khua dêh čar ta rơkâo hơdôm anih anom kơtưn hyu tir wai lăng, pơsir tơpă hơdôm bruă ngă soh pơhlôm hơđong ƀơi jơlan nao rai, jơlan rơdêh treng, jơlan hăng dlông ia. Pơsir tơpă hơdôm tơlơi ngă soh ƀu čut ao pông kơ su lom găn nao rai hăng song nan, ƀat tô; ƀat tô song nan ƀu prăp lui djop gơnam mă yua pơtlaih mơnuih, mơnuih mơgăt ƀat tô song nan ƀu hmâo ƀăng, hră mơgăt, hră pơsit juăt bruă lăp djơ̆... Pel ĕp bruă ngă tui tơlơi pơkă tơlơi phiăn pơgang pơhlôm hơđong, pơhlôm ƀơi jơlan nao rai pơ̆ anih jưh song nan tuai găn nao rai ia krông, tơdrun tum păn tuai čuă ngui, hơdôm song, jơlan nao rai, biă ñu hơdôm jơlan pơgiăng tuai čuă ngui mơng hang ia nao pơ̆ bul ia rơsĭ, hơdôm jơlan ia krông hăng kual ia hmâo pơphun jơnum ngui./.