Ƀơi tơring čar Kon Tum mông ngă yang huă pơsat Ơi pơtao Hùng dưi hmâo Grŭp mă bruă Đình Lương Khê hăng gong gai phường Thống Nhất, plơi prong Kon Tum pơphun yôm phăn, tŏng ten. Mơnuih ƀôn sang, tuai čuă ngui hăng khua pơ ala gong gai nao pơ̆ akô̆ plơi lu biă, kơkuh kơ ơi yă đưm rơkâo brơi lŏn ia rơnuk rơnua, ană plơi hơđong, hơjan klă pơ-iă hiam, pơhrui glăi pơdai jor kơtor lu.

Ƀơi tơring čar Gia Lai, khul mơnuih mơ̆ng plơi pla Vĩnh Phú (ră anai lĕ tơring čar Vĩnh Phúc hăng Phú Thọ) dô̆ hơdip mơda ƀơi hơdôm bôh tơring glông, plơi prong mơ̆ng tơring čar Gia Lai tum pơƀut ƀơi Pra yang Ơi pơtao Hùng pơ̆ să An Phú, plơi prong Plei Ku, ngă yang tuĭ yang hơdor kơ phun akha.

Ƀơi anih djă pioh gru grua đưm bôh thâo đưm lŏn ia Akô̆ plơi Lạc Giao, plơi prong Buôn Ma Thuột, gong gai hăng mơnuih ƀôn sang amăng tơring čar Dak Lak ngă yang huă pơsat Ơi pơtao Hùng pioh hơdor tơngiă ƀing Ơi pơtao Hùng hmâo tuh rơyuh pran jua pơdŏng lŏn ia.

Ƀơi Lâm Đồng, Ngă yang huă pơsat Ơi pơtao Hùng pơphun tơhmit, hăng hơdôm phiăn ngă yang phun anun lĕ: Pŭ hyu gơnam ngă yang kơ ơi yă đưm, phiăn ngă yang tui phiăn juăt hăng tuĭ ñang kơ ơi yă ƀơi Pra yang gah hlâo, tŏng krah, ƀơi tơkai Pra yang Âu Lạc amăng Kual tuai čuă ngui drai ia Prenn Đà Lạt. Anai lĕ tal pioh mơnuih ƀôn sang djop djuai ania Dap Kơdư anăp nao phun akha, pơdah pran jua pơpŭ, hơdor tơngia truh pran jua tuh rơyuh mơ̆ng ƀing Ơi pơtao Hùng hmâo pran jua pơdŏng lŏn ia wai lăng lŏn ia, mơ̆ng anun djru hơkrŭ đĭ hăng pơđĭ kyar pran jua gum hrŏm hơbit djop djuai ania./.