Tui Gơnong bruă sĭ mơdrô tơring čar Gialai, pơkă hlâo tơlơi kiăng blơi prăp gơnam amăng tal Tết tui phiăn juăt Quý Mão 2023 amra đĭ năng ai ñu 30%. Kiăng pơhlôm djơ̆ gơnam tam, Gơnong bruă hmâo rơkâo laih hơdôm bôh anom bruă, anom bơwih ƀong pok pơhai kơčăo bruă djă pioh hơdôm mơta gơnam kiăng yua hloh, biă ñu lĕ gơnam ƀong huă, ngă tui ba glăi bôh tơhnal jơlan hơdră hơđong nua gơnam, sĭ gơnam djơ̆ nua pơkă. Hrom hăng anun, hơdôm bôh anom kĭ pơkôl pơhlôm klă hiam gơnam tam, hmâo hră čih anăn gơnam nua sĭ tum djop, anih anom pơkra gơnam rơđah. Yă Đào Thị Thu Nguyệt, Kơ-iăng Khua Gơnong bruă sĭ mơdrô Gialai, lăi pơhing:

“Mrô gơnam tam thun anai pơkă hlâo amra lĕ 20.800 klai prăk, mrô djă pioh gơnam thun anai hơđong mơn. Gơnong bruă sĭ mơdrô ăt pok pơhai mơn hơdôm kơčăo bruă kơ hơdôm bôh anom bơwih ƀong pioh djă lui gơnam tam pơhlôm blơi sĭ hăng đing nao mơnuih Việt Nam blơi yua gơnam Việt Nam kiăng pok pơhai hơdôm jơlan hơdră amăng tal tết. Djă pioh gơnam pơhlôm djop, huăi đĭ nua amăng tal Tết tui phiăn juăt 2023 anai”.

Ƀơi tơring čar Daklak, anih anom sĭ mơdrô ƀơi plơi prong Buôn Ma Thuột, amai Nguyễn Thị Nguyệt, brơi thâo, tal Tết mrô gơnam pioh blơi sĭ đĭ lu giăm truh 3 wot, djơ̆ hrơi ñu dưi sĭ hmâo năng ai ñu 7 tạ sa hrơi.

“Anih anom anai sĭ mơdrô năng ai ñu hmâo mơng 40 - 50 thun laih, rim thun kâo pơkra gơnam Tết mrô gơnam lu, gơnam pioh yua pơkra gơnam ƀơi anai lĕ kơnong kơ yua añăm mơnong phrâo čuh tă soh đôč, ƀu hmâo yua gơnam dưm pler ôh, mă ƀơi anih čuh tă hlô mơtăm hmâo hơdôm hơpă ngă hơdôm anun. Ră anai bruă agaih rơnăk hơdjă jing yôm phăn hloh, bơ̆ hơdôm gơnam yua pơƀâo khom ngă tui Ding jum ia jrao, gơñu brơi yua hơdôm hơpă lĕ ta ngă tui hơdôm anun đôč”.

Anih anom pơkra gơnam ƀong huă Thành Phát, plơi prong Buôn Ma Thuột truh mông anai ăt hmâo djă pioh djop laih hơdôm mơta gơnam kiăng yua hloh. Tui hăng yă Vũ Thị Gấm, wai lăng anih anom pơkra gơnam, pơkă lăng hlâo, tal Tết thun anai mrô kiăng yua gơnam ƀong huă đĭ năng ai ñu 20% bơhmu hăng hrơi tơđar. Kiăng pơhlôm djop mrô gơnam, anom hmâo gơgrong hlâo rơkâo blơi hlâo gơnam ƀơi hơdôm anih anom mơng ƀôn prong Hồ Chí Minh hăng sa dua anom mă bruă hrom gah đang hmua hơdjă amăng tơring čar Daklak:

 “Gơnam tam kah hăng ƀañ, mưt, kĕo djop mơta lĕ dưi blơi mut 90% laih. Dua lĕ ră anai glăk pơphun pơkra añăm mơxăm củ kiệu, hơdôm mơta gơnam mơng hlâo tui phiăn juăt Tết. Thun hơpă leng tui anun soh, tui tơlơi pơkôl hăng wai lăng anih anom sĭ mơdrô, anom bơwih ƀong blơi mut gơnam tui djơ̆ phun akha pơkra rơđah, laih anun plăng anăn gơnam hơdôm gơnam blơi mut gơnam khom rơđah dong kiăng pơhlôm tơlơi dưi yua kơ mơnuih blơi yua”.

Kiăng pơhlôm klă hăng nua gơnam tam, rơbêh kơ 1 blan hăng anai khul Wai lăng anih anom sĭ mơdrô gah Anom wai lăng anih anom sĭ mơdrô tơring čar Daklak hmâo kơtưn hơdôm bruă mă pel ĕp wai lăng. Hrom hăng anun pơtrut kơtang lăi pơhing hyu tơlơi phiăn hăng tơlơi pơkôl pioh kơ hơdôm khul grŭp mơnuih ƀu dŭ pơgiăng djă pioh, sĭ mơdrô gơnam tam ngă mă ča, gơnam ƀu rơđah phun akha pơkra. Ơi Mai Mạnh Toàn, Khua Anom wai lăng anih anom sĭ mơdrô tơring čar Daklak brơi thâo:

 “Pơsit anih anom mơnuih, gơnam tam phun, čih pơkra kơčăo bruă jơlan gah rơđah pioh pok pơhai ba glăi bôh tơhnal, kơtưn pel ĕp wai lăng anih anom sĭ mơdrô hăng pơsir hơdôm bruă ngă soh pioh kơ gơnam kiăng yua hloh kơ mơnuih ƀôn sang amăng tal Tết”.

Tơring čar Daklak ăt pơdŏng mơn 3 Grŭp pel ĕp kơđi tơlơi kơ pơhlôm anô̆ pơhlôm gơnam ƀong huă, pơphun pel ĕp ƀơi hơdôm anih anom pơkra gơnam, sĭ mơdrô, blơi mut gơnam ƀong huă, sĭ mơdrô gơnam ƀong mơñum, sĭ mơdrô ƀong huă kơtuai jơlan ƀơi 7 bôh tơring glông, plơi prong hăng plơi prong Buôn Ma Thuột. Ơi Phạm Thế Hoan, Kơ-iăng Khua pel ĕp kơđi tơlơi gah Gơnong bruă đang hmua hăng pơđĭ kyar ƀôn lan brơi thâo:

 “Rơgao pel ĕp lĕ ƀuh kah hăng abih bang hơdôm bôh sang anô̆, khul grŭp mơnuih pơkra hăng sĭ gơnam gah pơhlôm gơnam ƀong huă ngă tui klă hơdôm tơlơi pơkă amăng tơlơi phiăn. Khă hnun hai hmâo sa dua bôh anih anom hmâo tơlơi ngă soh lĕ ƀing gơmơi pơphun pơsir tui tơlơi pơkă. Pơkĕ hrom hăng pel ĕp lĕ ƀing gơmơi amra lăi pơhing tơlơi pơkă kơ tơlơi phiăn pơhlôm gơnam ƀong huă hăng pơtô brơi kơ hơdôm anom bruă pơkra sĭ mơdrô gơnam pơhlôm gơnam ƀong huă tui tơlơi pơkă”.

Kiăng pơhlôm hơđong nua sĭ gơnam ƀrô djơ̆ tal Tết tui phiăn juăt Quý Mão 2023, Jơnum min mơnuih ƀôn sang tơring čar Daklak hmâo pioh laih rơbêh kơ 1.500 klai prăk pioh djă lui gơnam tam kiăng hloh. Ƀut gơnam kiăng đing nao hơđong tal rơnuč thun 2022 hăng Tết tui phiăn juăt Quý Mão 2023, lĕ: braih piăng amăng lŏn ia ta, añăm mơnong un, mơnŭ bip, bôh mơnŭ bip, ia rơmuă, sik, ngok hăng hơdôm mơta gơnam ƀong pơkra, añăm hla rok hơbơi pơtơi bôh troh, ia xăng ia jâu. Hrơi pơkă hơđong nua mă mơng lơ 30/11/2022 truh lơ 30/2/2023./.