Ƀơi tơring čar Kontum, 2 hrơi lơ 24, 25/12, lu neh wa tui đăo khop mơ-ak gum hrom nao pơhmư̆ mông jơnum ƀơi hơdôm bôh sang jơnum mơ-ak čơkă Noel rơkâo brơi thun phrâo 2023 mơ-ak klă, tâ̆o yâu. Kiăng mơ-ak mlăm jơnum Noel pơphun rơnuk rơnua, yâu mơ-ak, hơdôm bôh sang jơnum gah khul đăo Kontum leng kơ gum hrom hăng gong gai plơi pla amăng bruă pơhlôm pơgang rơnuk rơnua hơđong.

Ƀơi hơdôm bôh sang jơnum amăng tơring čar Kontum, kah hăng: Sang jơnum pơkra hăng hnal kyâu, Sang jơnum khul đăo Tân Hương, Sang jơnum khul đăo Phương Nghĩa... anih tum pơƀut lu mơnuih tui đăo hăng tuai hyu čuă ngui dô̆ prăp brơi jơlan gah pơhlôm hơđong ƀơi jơlan nao rai jum dar kual sang jơnum. Lăi pơthâo nao rai hăng khua gong gai, hơdôm khul grŭp nao čuă, hơ-ư̆č hmưi Noel, Ama wai lăng Khul đăo Kontum Nguyễn Hùng Vị lăi đĭ pran jua gum hrom djuai ania, gum hrom lŏn ia mơng Khul đăo Kontum hăng neh wa tui đăo.

Ƀơi Gia Lai amăng mlam lơ 24 hăng lơ 25/12 mơnuih ƀôn sang đăo khop hăng đăo phrâo hiam hok mơak čơkă Noel thun 2022. Ƀơi plơi prong Plei Ku, tơlơi mơak čơkă Noel kơdok kơdor ƀơi djop anih. Ƀơi tơring đăo khop Thăng Thiên, phường Tây Sơn, tơring đăo Thánh Tâm, phường Phù Đổng,  Hoa Lư, Đức An, Phường Ia Kring….mơnuih ƀôn sang đăo pơtum jơnum čơkă Noel mơak mơai. Tơdơi kơ lu thun bơbeč yua klin kleng ngă, truh thun anai, tơlơi mơak Noel lu hloh kơdor djop tơlơi đăo, ƀing hlăk ai yơh hyu ngui mơak lu.

Mrô hlăk ai hăng mơnuih ƀôn sang ngă hrom hyu ngui čuă jơmư trư găn nao rai ăt lu mơ̆n amăng djop jơlan lơ̆m glông plơi prong. Ƀrô djơ̆ tal anai, djop anom bruă kơnuk kơna, biă mă jơnum min djop djuai ania mơnuih mơnam tơring čar hyu čuă jơmư trư găn pơpŭ bơni mơak hrơi Noel kơ djop tơring đăo hăng sang adai jơnum đăo phrâo hiam.