Pơhiăp amăng mông jơnum, Khua git gai Ping gah dêh čar ta ơi Tô Lâm yap glăi hơdôm bôh tơhnal ƀuh rơđah yôm phăn kah hăng amăng abih bang bruă mơ̆ng Lŏn ia amăng thun 2024, lăi rơđah amăng hơdôm bôh than dưi ngă hmâo tơlơi djru prong biă mơ̆ng khua mua hơđăp, ƀing tha rơma ngă hơkrŭ hăng lu mơnuih thâo hră, rơgơi mơbruă amăng lŏn ia hăng mơnuih Việt Nam pơ̆ dêh čar tač rơngiao.

Gah bruă jao pơ̆ anăp anai, tui hăng Khua git gai Ping gah dêh čar pioh glăm ba bruă yôm prong mơ̆ng gru grua ngă brơi lŏn ia kơjăp yak nao rơnuk phrâo, pơ̆ anăp anai, ƀing ta khom pơplih phrâo kơtang jơlan gah git gai, pơđĭ dlông bôh thâo git gai, bôh thâo apăn bruă gong gai mơ̆ng Ping gah. Lăi nao bruă jao phun lĕ pơđĭ kyar bơwih ƀong - mơnuih mơnam, Khua git gai Ping gah lăi lĕ, abih bang glông bruă kơđi čar ăt kiăng đing nao ngă tui ba glăi bôh tơhnal mơn hăng sit nik bruă dăp glăi hơdră bơwih ƀong, nao hrŏm hăng pơplih phrâo hơdră pơđĭ kyar, pơdŏng ƀơi atur kơjăp, hơdră mă yua măi mok, pơplih mrô./.