Hlâo kơ anun, mơguah tom brơi (11/6), Ping gah Kông ang dêh čar ta gum hrŏm hăng Anom bruă Ping gah dêh čar hăng Grŭp pơphun bruă ngă Lơphet lăi pơthâo tơlơi Pơsit mơ̆ng Ding jum kơđi čar ruah Thượng tướng Lương Tam Quang, Ding kơna git gai Ping gah dêh čar, Khua Ding jum Kông ang dêh čar ngă Khua git gai Ping gah Kông ang dêh car, rơwang bruă 2020-2025.

Pơhiăp čơkă mă bruă jao, Khua Ding jum Lương Tam Quang bơni tơlơi djă pioh, đăo kơnang, jao bruă mơ̆ng Ping gah, ƀơi anăp lĕ Ding jum kơđi čar, Grŭp apăn bruă Ping gah, Khua git gai Ping gah dêh čar ta ơi Nguyễn Phú Trọng pioh kơ ñu. Khua Ding jum Lương Tam Quang ƀuan hăng bruă apăn phrâo amra gum hrŏm hơbit, pơlir hơbit, gum hrŏm Grŭp Ping gah Kông ang dêh čar tŭ mă, ngă tui phiăn juăt ư-ang, ngă tui tơpă, ba glăi bôh tơhnal bruă apăn, bruă jao. Djă pioh ngă tui tơpă Bruă kơđi čar, Tơlơi pơkă mơ̆ng Ping gah, hơdôm tơlơi phiăn mơ̆ng Ping gah, biă ñu tơlơi phiăn pơkă đing nao tơlơi tơpă; lăng yôm bruă ba gru hlâo, ngă tui pran jua khin pơmin, khin ngă, khin gơgrong; abih pran jua, abih pran jua yua kơ bruă mă hrŏm./.