Tơdơi kơ 3 blan jak iâu, Khul khua mua pơphun tal pơplông tŭ mă rơbêh 1 rơbâo tơlơi pơplông mơ̆ng 500 čô mơnuih pô kač, čơphil rup hăng čih pơkra. Rup kač hăng tơlơi čih pôr bơni kơ gru grua hing ang, kông an mơnuih ƀôn sang ba gru hlâo, akŏ pơdong ping gah, akŏ pơdong ling tơhan kơtang, tơpă, ngă tui djơ̆ 6 mơta tơlơi Wa Hồ pơtô găn rơgao 75 thun pơ klôn adih.

Bơni hơ-ơč tơlơi khin hơtai tuh drah pơčah asar hăng pơyơr pran jua mơ̆ng djop gưl rơnuk ƀing khua mua, ling tơhan kông an pơgang dêh čar hăng pơgang anŏ hơđong, rơnuk rơnua kơ mơnuih mơnam. Amăng anun, lu tơlơi čih, rup kač hăng rup rap kông an kơtưn nao amăng bruă mă  pơ kual plơi pla, djru hrom pơgang rơnuk rơnua, pơđĭ tui pran jua, ai hơtai yua kơ lŏn ia wor rơbit drơi jăn pô, yua kơ mơnuih ƀôn sang khom ngă bruă. Pơđut tal jơnum, Khul khua mua čom puang hơmâo ruah mă hăng apah bơni 5 pri A, 10 pri B, 15 pri C hăng 20 pri pơsur pran jua.