Thun 2018, Y Vui Ayun prong pran săn hơtai ba jơlan hlâo khul tơhan pơgang mă pô să Ea Kao, plơi prong Buôn Ma Thuột. Rơbêh kơ 6 thun kĕ phĭ hăng khul tơhan pơgang mă pô, ñu ngă tui na nao pran jua ƀu huĭ kơ tơnap, glêh glar, gum hrŏm klă hơdôm bruă pơhrăm, amra kơdŏng tơlơi ngă sat, ngă klă bruă pơtô ba mơnuih ƀôn sang, pơhlôm rơnuk rơnua hơđong plơi pla, pơgang pơgăn ayuh hyiăng ƀu klă ngă. Biă ñu, amăng hơdôm tal klin Covid-19 gluh đĭ amăng thun 2020 hăng 2021, ñu ba jơlan hlâo nao pơ̆ kual hmâo anih klin ngă kơtang pioh djru djop mơnuih pơgang pơgăn klin. Hrŏm hăng anun, ñu ăt ngă klă mơn bruă đang hmua pơđĭ kyar bơwih ƀong sang anô̆. Hăng sa ektar đang kơphê pla plah phun sầu riêng, ră anai rim thun đang phun pla hmâo kơmlai rơbêh kơ 300 klăk prăk. Ñu lăi pơthâo, kơnang kơ ngă giong klă bruă jao hăng bơwih ƀong huă rơgơi, thun 2022, ñu lĕ sa amăng lu mơnuih mơbruă hmâo Grŭp Ping gah buôn Huê, să Ea Kao lăi pơthâo nao pơhrăm anih pơtô kơ bruă Ping gah hăng dưi mut ping gah sa thun tơdơi kơ anun. Y Vui pơdah pran jua tui anai:

  “Lơm dưi mut ping gah, kâo mơ-ak biă hăng ư-ang. Kâo hrưn đĭ na nao ngă giong djop bruă hmâo jao, hăng ba jơlan hlâo amăng bruă bơwih ƀong đĭ kyar, hrŏ trun ƀun rin. Lơm jing mơnuih ping gah sit nik kâo ăt hrưn đĭ mơn, hrăm tui, pơhrăm ngă giong bruă jao”.

 Amăng thun 2023, yap kơnong kơ Grŭp črâo ba khul ling tơhan să Ea Kao, hmâo laih 3 čô tơhan pơgang mă pô mut ping gah. Abih bang leng kơ hơdôm mơnuih mơbruă, hmâo lu tơlơi gir run amăng ngă tui bruă jao, pơhrăm drơi pô, gum hrŏm pơhrăm bruă, pơhrăm blah ba glăi bôh tơhnal klă ăt kah hăng gum hrŏm pơđĭ kyar bơwih ƀong sang anô̆. Hăng sa amăng 3 čô mơnuih mơbruă mơ̆ng Grŭp git gai khul ling tơhan să Ea Kao dưi mut ping gah thun 2023, Nguyễn Thanh Tùng, ư-ang lăi:

“Hăng bruă mă sa čô mơnuih ping gah, kâo khom ngă klă hloh dong bruă jao mơ̆ng pô yap wot ƀơi ƀirô ăt kah hăng pơ̆ sang. Drơi pô kâo khom ngă klă mông mă bruă mơ̆ng khul tơhan pơgang mă pô, pơhrăm drơi pô, bruă kơdŏng blah, ngă giong hơdôm bruă jao mơ̆ng Grŭp ping gah, Grŭp git gai khul ling tơhan să jao, gum hrŏm pơgang rơnuk rơnua hơđong ƀơi să, plơi pla”.

 Să Ea Kao hmâo 14 bôh ƀôn, hăng rơbêh kơ 20.000 čô mơnuih, amăng anun hmâo năng ai ñu 45% lĕ djuai ania ƀiă. Ping gah să hmâo giăm truh 350 čô mơnuih ping gah, jơnum ƀơi 23 grŭp ping gah. Ơi Y Mnông H’đơk – Khua git gai Ping gah să brơi thâo, ngă tui bruă pơlar Ping gah, biă ñu amăng khul tơhan pơgang mă pô hơdôm Grŭp ping gah, Grŭp Ping gah plơi pla hmâo pơphô brơi Ping gah să git gai, pơpha bruă ping gah lăng tui gum djru hrưn đĭ, pơhrăm drơi pô, pơhrăm pô, lăi pơthâo mơnuih mơbruă nao pơhrăm hơdôm anih pơtô bruă thâo kơ ping gah hăng pel ĕp pơmut brơi.

 “Thun 2024 ƀing gơmơi pơsit pơmut 2 čô mơnuih mut ping gah ƀơi khul tơhan pơgang mă pô. Ră anai ƀơi Grŭp git gai khul ling tơhan să, hmâo pơtô brơi 2 čô mơnuih mơbruă čih tơlơi lăi pơthâo pô pioh pel ĕp, hăng pơkă hlâo truh 3 blan tal 3 ngă lơphet pơmut ping gah”.

Plơi prong Buôn Ma Thuột hmâo 13 bôh phường hăng 8 bôh să, hăng giăm truh 400 rơbâo čô mơnuih, amăng anun hmâo năng ai ñu 1.900 lĕ tơhan plơi pơgang mă pô, mrô mơnuih ping gah ră anai hmâo 25%. Tui hăng Thượng tá Mai Văn Khuê, Kơ-iăng Khua git gai Ping gah Khul ling tơhan plơi prong Buôn Ma Thuột – Ding kơna apăn bruă kơđi čar Grŭp git gai khul ling tơhan plơi prong, kiăng pơdŏng khul tơhan plơi pơgang mă pô kơjăp kơtang, pơhlôm abih bang, hmâo rơnoh đăo gơnang prong gah bruă kơđi čar hăng pơđĭ bôh thâo amra kơdŏng glăi thơ bruă ruah mă, pơjing khul, pơlar mơnuih ping gah amăng khul anai jing dưi hmâo Ping gah plơi prong hăng hơdôm Gưl Ping gah plơi pla đing nao pok pơhai ngă tui.

Thượng tá Mai Văn Khuê brơi thâo, kiăng pơđĭ mrô mơnuih ping gah amăng khul tơhan pơgang mă pô, Ping gah, Grŭp git gai khul ling tơhan plơi prong hmâo gơgrong hlâo pơphô brơi kơ Grŭp apăn bruă Ping gah plơi prong mă yua hơdôm Tơlơi črâo ba kơ kơtưn git gai bruă jao pơgang lŏn ia, khul tơhan plơi prong; pơsĭt rơđah tơhnal pơkă, mrô pơmut ping gah amăng khul anai tui kơčăo bruă ba tơbiă.

“Ƀing gơmơi gum hrŏm hăng Grŭp pơphun bruă Ping gah plơi prong jao tơhnal bruă kơ Ping gah hơdôm bôh să, phường, rim thun rim plơi pla mrô pơmut ping gah mơ̆ng 2 čô mơnuih hăng lu hloh. Khă hnun hai bôh nik ră anai, lu anom bruă hmâo pơmut brơi 3 ƀudah 4 čô mơnuih mut ping gah”.

Hăng bruă đing nao pơdŏng hăng pơlar mơnuih ping gah amăng khul tơhan pơgang mă pô ƀơi plơi prong Buôn Ma Thuột, khul mơnuih apăn bruă plơi pla na nao dưi ngă giong bruă hăng kơjăp klă, hmâo tơhnal tŭ mă, na nao. Bôh thâo git gai, pran hrưn đĭ mơ̆ng grŭp ping gah hăng khul mơnuih ping gah amăng khul ling tơhan ƀu pơdơi pơđĭ tui, djru ngă klă bruă jao pơgang lŏn ia, rơnuk rơnua plơi pla, pơhlôm hơđong plơi pla./.