Anih jơnum mrô 2 mơ̆ng Sang ia jrao prong Dap Kơdư hơdôm hrơi anai hyơ hyơr hla kơ mriah pơtŭ kơñi. Anai jing anih plĕ hră mrô 44 gah Jơnum min ruah khua phương Buôn Ma Thuột, tơring čar Dak Lăk. Ơi ia jrao Nguyễn Ngọc Thịnh, Kơ-iăng khua sang ia jrao, Khua grup plĕ hră ƀơi Sang ia jrao, brơi thâo, truh mông anai, djŏp bruă plĕ hră ruah khua hơmâo prăp giong laih: “Abih bang mơnuih mă bruă amăng sang ia jrao hơmâo laih hră kơtri. Ƀơi sang ia jrao hơmâo tơlơi phara lĕ ƀing duam ruă hăng pô sang kiăo tui đih glăi pơ anai, yua hnun, Grup plĕ hră mơ̆ng sang ia jrao jao kơ 2 čô prăp rơmet wai lăng kơthung plĕ hră, ba nao tơl sưng đih ƀing ruă, kiăng ƀing duam ruă ƀu dưi rơbat hyu ăt dưi plĕ hră hlao pơ anih đih mơtăm”.

Điều dưỡng Nguyễn Thị Cẩm Vân, brơi thâo: Anai jing thun tal 3 ñu nao plĕ hră pơ sang ia jrao mơtăm. Mah bruă wai lăng pơjrao brơi ƀing duam ruă glêh biă, ƀu hmao đơi ôh, samơ̆ amăng mông pơdơi, ñu juăt nao pơ anih tĕp anăn ƀing plĕ hră hăng ƀing khua či ruah či pơđok lăng. Ñu kiăng ruah mă ƀing rơgơi, thâo pơmin đah mơ̆ng dưi mơit nao tơlơi kiăng khăp mơ̆ng pô: “Kâo kiăng ruah mă ƀing khua rơgơi, hơmâo tơlơi pơmin, dưi pơtruh tơlơi phiăp mơ̆ng sang ia jrao hăng Ping gah, Kơnuk kơn. Ƀing gơñu yơh pơ ala brơi tơlơi pơmin, tơlơi kiăng mơ̆ng ƀing gơmơi; laih dong tơlơi pơhiăp mơ̆ng ƀing gơmơi mơit nao ƀing gơñu amra dưi truh pơ Ping gah, Kơnuk kơna, kiăng dưi lăng ba hloh, tuh pơ alin brơi gơmơi anih anom, gơnam yua, kiăng sang ia jrao klă hloh, bơwih brơi tơlơi suaih pral kơ mơnuih ƀôn sang Dak Lăk klă hloh”.

Sang ia jrao prong Dap Kơdư prong biă, hơmâo 1.200 boh sưng, laih anun rơbêh 1.250 čô khua, ơi ia jrao, mơnuih mă bruă. Amăng hrơi plĕ hră hrơi pơgi, ƀing nao plĕ hră jing ƀing khua, ơi ia jrao, mơnuih mă bruă amra hrŏm hăng hơdôm rơbâo čô mơnuih duam ruă dŏ pơjrao pơ anai amra nao plĕ hră pơ anih plĕ hră mrô 44, gah Jơnum min ruah khua phương Buôn Ma Thuột, Dak Lăk. Hăng tơlơi prăp rơmet klă, bruă ruah khua ƀơi anih plĕ hră “phara” anai amra truh kih, rơnuk rơnua, djơ̆ tơlơi phiăn./.