Ƀơi phường Phan Thiết, phường tong krah kual ia rơsĭ tơring čar Lâm Đồng, găn rơgao hơdôm hrơi rơgao, tơlơi bơră ruai lăi nao hrơi plĕ hră hmư̆ ƀruk ƀrăk mơtăm amăng plơi. Mơnuih ƀôn sang nao ĕp lăng ƀing tơbiă anăn, tơlơi pơhing hăng jơlan hơdră ngă bruă mơng ƀing tơbiă anăn kiăng kơ ruah ƀing mơnuih djơ̆ tơlơi kiăng. Hăng mơnuih ƀon sang ƀơi anai, nao plĕ hră ƀu djơ̆ kơnong lĕ tơlơi dưi pô đôč ôh mơ̆ ăt lĕ tơlơi glămn ba mơng mơnuih ƀôn sang hăng lŏn ia. Ơi Trần Hữu Trung, dŏ amăng ƀut plơi 14, phường Phan Thiết brơi thâo:

“Blung hlâo lĕ amăng sang anŏ neh met wa amăng plơi pla, amăng hrơi tơjuh kiăng prap rơmet bruă mă laih anun nao plĕ hră djop. Ƀơi anai tui phiăn juăt mơng đưm hlâo truh ră anai, truh yang hrơi dong amra plĕ hră giong. Mơnuih ƀôn sang čang rơmang abih bang mơnuih ba gru, thâo rơgơi amra đĭ ngă khua git gai mơnuih ƀon sang hăng sit biă ñu amăng rơwang ngă bruă anai lĕ pơplih tơlơi pơmĭn yua anun mơnuih ƀôn sang hur har mơ-ak biă mă”.

Pran jua hur har prap lui hrơi plĕ hră ăt glăk lar hyu tơl hơdôm kual čư̆ siăng amăng tơring čar Lâm Đồng. Ƀơi ƀut plơi Long Lanh, să Lạc Dương, anih dŏ hơdip kơ mơnuih djuai ania K’ho, hơdôm tơlơi pơhing lăi nao hrơi plĕ hră hơmâo mơnuih ƀôn sang đing nao, pơlăi nao rai amăng hơdôm mông jơnum pơƀut amăng plơi pla hăng amăng rĭm boh sang anŏ. Amai Dà Ju K’Tim brơi thâo:

“Lơm bưp gơyut gơyâo kah hăng bơră ruai amăng sang anŏ, kâo ăt pơlăi nao rai hăng pơblang brơi dong sa, dua boh tơhnal bơdjơ̆ nao hrơi plĕ hră. Kơ hrơi mông plĕ hră, ƀing tơbiă anăn ruah ngă khua mua tal anai hăng anih plĕ hră. Rơwang tal anai lĕ sa rơwang ngă bruă yôm phăn, kâo ăt čang rơmang kâo pô hăng mơnuih ƀôn sang ruah khua pơkŏn amra ruah ƀing mơnuih hơdip ba gru, thâo rơgơi hăng thâo glăm ba, hơmâo tơlơi pơplih phrâo kiăng pơjing kơnuk kơna mơng mơnuih ƀôn sang, kơ mơnuih ƀôn sang, yua mơnuih ƀôn sang”.

Mơng kual ia rơsĭ truh pơ kual čư̆ siăng tơring čar Lâm Đồng, abih bang lêng kơ anăp nao hrơi plĕ hră ruah khua pơ ala mơnuih ƀôn sang tal XVI hăng khua mua jơnum min pơ ala mơnuih ƀon sang djop gưl rơwang thun 2026-2031 hăng pran đăo gơnang hăng tơlơi čang rơmang prong hloh. Lơ 15/3 rơbêh 2,7 klăk čô mơnuih ƀôn sang amăng tơring čar Lâm Đồng hăng rĭm pok hră plĕ kiăng pơmĭn tong ten, ruah djơ̆ mơnuih kiăng mơ-it nao tơlơi čang rơmang mơng mơnuih ƀôn sang hăng ƀing tơbiă anăn, anai lĕ ƀing hơdip ba gru, thâo rơgơi, abih pran jua ngă bruă kơ lŏn ia hăng mơnuih ƀôn sang./.