Ƀut plơi mrô 6, phường Quy Nhơn, hơmâo 67 boh ƀattô mă akan hơdang hăng 200 čô mơnuih juăt trun ia hyu mă akan hơdang dŏ na nao amăng jơlah ia, sui hrơi lơ̆m ia rơsĭ. Hơdôm hrơi giăm anai, lơ̆m ƀattô glăi pơ sang, tơdơi kơ tal trun ia hyu pơ ataih sui hrơi amăng ia rơsĭ, yă Mai Thị Gái, Khua khul wai lăng djop djuai ania mơnuih mơnam ƀut plơi mrô 6, nao truh pơ anih jưh, akă hrĕ tơdrun kompan, anih jưh khul ƀattô glăi pơ hang, pioh pơtô lăi kơ hrơi plĕ hră ruah khua. Pơ anai, ñu hyu pơpha hră tơlơi pơhing anet djă hyu pioh pơđok kiăng thâo hrơi mông nao plĕ hră, laih dơ̆ng jak iâu ană plơi pla dăp hrơi mông nao ngă tui tơlơi dưi hăng bruă glăm ba mơ̆ng ta pô, jing sa čô mơnuih ƀôn sang.

Hơdôm ƀattô hlăk dŏ mă akan hơdang amăng ia rơsĭ aka ƀu glăi, ñu lăi pơthâo mơnuih amăng sang anŏ, brơi pơhiăp nao rai hăng ƀing dŏ pơ ia rơsĭ ataih, lăi pơthâo tơlơi pơhing, brơi gơñu glăi jưh pơ tơdrun kompan jăng jai, nao plĕ hră ruah khua hơmâo ha hrơi, laih anun nao dơ̆ng. Ya Mai Thị Gái brơi thâo:

“Rim hrơi, grup pơphun bruă ruah khua nao tơl sang djop sang anŏ pơtô lăi, pôr pơthâo, jak iâu mơnuih ƀôn sang dăp hrơi mông pioh nao plĕ hră ruah khua. Ƀing tơbiă anăn ƀơi phường Quy Nhơn ăt dưi lăi pơthâo rơđah pioh kơ mơnuih ƀôn sang hyu mă akan hơdang thâo tong ten tơlơi pơhing kơ ƀing gơñu, ruah mă mơnuih lăp mut ngă pô pơ ala mơnuih ƀôn sang dêh čar”.

Dưi hmư̆ tơlơi arăng pơtô lăi ƀơi anăp mơta, lu mơnuih hyu mă akan hơdang thâo hluh rơđah boh yom kơ hla hră plĕ ruah mơnuih ngă khua ƀudah pô pơ ala kơ mơnuih ƀôn sang laih anun amra nao plĕ hră ruah khua amăng hrơi ruah khua. Mơnuih ƀôn sang mă akan hơdang Nguyễn Văn Tuấn, dŏ ƀơi ƀut plơi mrô 6, phường Quy Nhơn brơi thâo, ƀing adơi ayong amăng ƀattô hơmâo  prăp lui yơh hrơi mông, dăp bruă kiăng glăi nao plĕ hră tum djop, hmao hrơi mông amăng hrơi plĕ hră.

“Prăp lui truh hrơi plĕ hră ruah khua lơ 15/3, kâo ăt ngă djơ̆ tơlơi phiăn pơkă, amra pơdơi sa hrơi pioh nao tañ plĕ hră ruah khua ƀơi plơi pla”.

Hrŏm hăng lu hơdră hyu pơtô lăi, pôr pơthâo, pok pơblang čih amăng bơnal păng, tăng hră pano, ap phich amăng anih plĕ hră hăng ƀơi  akiăng jơlan phun lu mơnuih rô nao rai, gong gai kơnuk kơna plơi pla, dŏ pơtrut kơtang bruă hyu pơtô lăi, tơl anih akă khăm ƀattô, anih jưh song nan, tơdrun kompan đĭ trun ƀơi hăng ia, djru mơnuih ƀôn sang hyu mă akan hơdang kiăng thâo tong ten boh yom kơ tal plĕ hră ruah khua. Yua kơ anun, lu mơnuih ƀôn sang mă akan hơdang prăp lui hrơi mông glăi pơ hang, prăp lui hăng sang anŏ nao plĕ hră ruah khua tuk djop. Ơi Nguyễn Đức Toàn, Khua Jơnum min ruah khua phường Quy Nhơn brơi thâo, phường hơmâo pok pơhai lu hơdră kiăng pơhlom brơi ƀing hyu mă akan hơdang, jing mơnuih ƀôn sang ruah khua juăt  trun ia amăng ia rơsĭ sui hrơi, ăt dưi glăi ngă tui djop tơlơi dưi hăng bruă glăm ba mơ̆ng gơñu ruah khua.

“Lu kơ mơnuih ƀôn sang hyu mă akan hơdang amăng ia rơsĭ, hơmâo mơ̆n mơnuih dŏ pơ sang anŏ amăng kơdư hang. Lu plơi pla ƀôn ƀut hăng anih plĕ hră ruah khua hơmâo brơi nao tơl rim sang anŏ, ƀơk pơpha hl kơtri, hră plĕ ruah khua, laih anun hlong ƀơk hră anet čih tơlơi pơhing kơ bruă ruah khua, ƀơk hla gru brơi hlă ƀudah akă kơ ƀơi anăp sang, ƀơi bơbung ƀattô čơkă mơak hrơi plĕ hră ruah khua. Lu sang anŏ ăt tŭ mă tơlơi pơhing hmao kru pioh kơ mơnuih hyu mă akan hơdang thâo, dăp bruă, hrơi mông glăi pơ sang anŏ hlâo kơ lơ 15/3 kiăng nao plĕ hră ruah khua djơ̆ tơlơi phiăn”. 

Tui hăng ơi Bùi Duy Ninh, Kơ-iăng Khua Jơnum min mơnuih ƀôn sang phường Quy Nhơn Đông, bruă mă hyu pơtô lăi, jak iâu mơnuih ƀôn sang nao plĕ hră ruah khua ƀơi plơi pla, đing nao tong ten biă mă. Phường hơmâo git gai djop plơi pla, ƀôn ƀut, grup ruah khua ngă hrŏm grup wai lăng ƀing trun ia hyu mă akan hơdang thâo hrơi mông anih plĕ hră, laih anun dăp bruă glăi pơ hang, či nao plĕ hră ruah khua. Laih dơ̆ng kơtưn djru pơtô lăi kơ mơnuih ƀôn sang hyu mă akan hơdang, pôr amăng mikrô, lua pơhiăp prong amăng plơi pla, pơtô lăi amăng mông jơnum ană plơi hăng nao bưp ƀing dŏ mă akan hơdang, pơhrui akan hơdang ƀơi tơdrun kompan, anih jưh khul ƀattô, song nan mă akan.

“Mơnuih ƀôn sang mă akan hơdang amăng phường lu biă mă, juăt nao mă akan hơdang sui hrơi amăng ia rơsĭ, yua kơ anun bruă pơtô lăi, pôr pơthâo hăng ja iâu mơnuih ƀôn sang mă akan hơdang nao ruah khua hơmâo gong gai plơi pla đing nao biă mă. Laih dơ̆ng jak iâu mơnuih ƀôn sang mă akan hơdang dăp hrơi mông trun nao pơ ia rơsĭ djơ̆ găl, pioh glăi pơ sang anŏ, nao plĕ hră ruah khua djop, tum mơnuih”.

Hăng tơlơi gum hrŏm mơ̆ng abih bang glông bruă kơđi čar, mơnuih ƀôn sang mă akan hơdang ƀơi djop plơi pla treng hang ia rơsĭ ƀơi tơring čar Gia Lai thâo hluh ten tơlơi dưi, bruă glăm ba mơ̆ng ta pô, prăp lui bruă mă, hrơi mông či glăi pơ sang anŏ laih anun nao plĕ hră ruah khua hrŏm hrơi mơak abih bang ană plơi pla dêh čar. Hla hră plĕ ruah khua mơ̆ng mơnuih ƀôn sang ƀing juăt dŏ amăng ia rơsĭ sui hrơi ăt amra pơgôp hrŏm yom amăng boh tơhnal tŭ yua tal ruah khua pơ anăp anai.