Pơhiăp amăng mông ngă lơphet pok phun Festival bơnga Đà Lạt tal 9, Kơ-iăng Khua mir sir dêh čar ta yă Võ Thị Ánh Xuân lăi lĕ, tơdơi giăm hmâo 130 thun pơjing hăng pơđĭ kyar, Đà Lạt – plơi prong bơnga ƀu djơ̆ kơnong kơ pơtŏng sit anih anom phun bruă kơđi čar, mă bruă čar, bơwih ƀong, bôh thâo mơng tơring čar Lâm Đồng ôh mơ̆, ñu dô̆ djru klă pơđĭ kyar kual Dăp Kơdư tañ hăng kơjăp phik. Festival bơnga Đà Lạt tal 9 lĕ jơnum ngui pha ra, hmâo bơdjơ̆ nao sit nik, pơpŭ gru hiam ha jăn mơng Đà Lạt, laih anun pơtrut tơlơi pơđĭ kyar bruă bơwih ƀong huă, sĭ mơdrô hăng sĭ bơnga kơ dêh čar tač rơngiao, gơnam mă mơng đang hmua dưi tŭ yap laih anăn “Đà Lạt - ruah mă klă mơng lŏn hiam”. Kơ-iăng Khua mir sir dêh čar ta yă Võ Thị Ánh Xuân lăi:

 “Tơlơi pơtrun pơsit mrô 23 mơng Ding jum kơđi čar hmâo pơsit laih plơi prong Đà Lạt lĕ kual Dơnung Dăp Kơdư”. Tơlơi anai brơi ƀuh Ping gah hăng Kơnuk kơna ta đăo gơnang, djă pioh, pơsit yôm tơlơi gir run, pran pơsit hăng hơdôm bôh tơhnal yôm phăn mơ̆ Ping gah, gong gai, mơnuih ƀôn sang djop djuai ania tơring čar Lâm Đồng, plơi prong Đà Lạt dưi ngă laih amăng hơdôm hrơi rơgao, ăt kah hăng hơdôm tơhnal gal, anô̆ gal pha ra mơng plơi pla. Kâo čang rơmang lĕ, pơ̆ anăp anai, Đà Lạt – Lâm Đồng ngă tui prong kơtang dong mơng pran gum hrom hơbit djuai ania, mă yua ba glăi bôh tơhnal hơdôm tơhnal gal, anô̆ gal mơng plơi pla, djru lăp djơ̆ hăng tơlơi pơđĭ kyar hrom mơng kual Dăp Kơdư hăng đơ đam dêh čar”.

Hăng anăn ñu “Đà Lạt – Plơi prong 4 bơyan bơnga”,  Festival bơnga Đà Lạt tal 9 thun 2022 jing tơlơi tô̆ tui, pơtŏng sit, pơpŭ mơnuih pla bơnga hăng lăi pơhư̆č hơdôm nua yôm kơ bơnga, hơdôm mơta gơnam mă mơng đang hmua hmư̆ hing hăng ha jăn Đà Lạt hmâo. Amăng anun, bơnga ƀơi anai sit nik ba glăi laih prăk pơhrui glăi lu, djru yôm phăn amăng bruă pơđĭ kyar bơwih ƀong – mơnuih mơnam hrom mơng tơring čar Lâm Đồng.

Bruă pơdă sĭ añăm bơnga Đà Lạt hmâo sit nik pok amăng ƀơi hang dơnao ia Xuân Hương, tum pơƀut lu gơnam mă mơng đang hmua ha jăn Đà Lạt hmâo pioh pơdă prưng, lăi pơthâo truh djop mơnuih. Bruă pơdă sĭ gơnam ngă pơhư̆č giăm truh 50 khul grŭp, mơnuih hăng 90 čơgăn pơdă añăm hla rok, bơnga, če, kơ phê hrom hăng hơdôm gơnam mă mơng đang hmua OCOP pha ra, anô̆ gal mơng Đà Lạt – Lâm Đồng. Amai Trần Thị Thanh Tuyền lăi:

 “Kâo juăt gah bruă pla añăm hla rok, hơbơi pơtơi, bôh troh djop mơta pha ra mơng Đà Lạt kah hăng pơhăng teng leng, añăm sơnum mriah, rơsun prang mriah, hơbơi prang, cần prang, lu gơnam pơkon dong. Grŭp pơphun bruă jơnum ngui djru hur har pran jua biă, rơđah biă ñu in tơglit kơ pô hnal pơanăn, pơkra lui hlâo kơ pô anih pơdă sĭ gơnam, ta kơnong kơ ba gơnam nao pơdă lu biă. Kâo čang rơmang biă gơnam tam mơng Đà Lạt hyu lăi pơthâo kiăng lu mơnuih thâo truh”.

Tal anai, Gơnong bruă sĭ mơdrô tơring čar Lâm Đồng gum hrom hăng Jơnum min mơnuih ƀôn sang plơi prong Đà Lạt pơphun lăi pơthâo anih pơdă prưng, lăi pơthâo hăng sĭ gơnam hmâo čih anăn “Đà Lạt – Ruah mă klă mơng lŏn hiam”. Truh ră anai, plơi prong Đà Lạt hmâo pơsit laih hră tŭ yap anăn “Đà Lạt – Ruah mă klă mơng lŏn hiam” brơi kơ 768 bôh anom, khul grŭp, mơnuih, hăng 4 djuai mơta gơnam lĕ: añăm hla rok, bơnga, kơ phê hăng tuai čuă lăng đang hmua. Anăn gơnam jai hrơi jai pơjing gru pơđom pioh hăng mơnuih blơi yua amăng lŏn ia ta hăng mơng dêh čar tač rơngiao, amăng ƀrư̆ pơdah lĕ sa anăn gơnam hmâo pran kơtang. Ơi Phan Ngọc Thạch, Khua Khul wai lăng Anom mă bruă hrom gah bruă đang hmua lu mơta Sunfood Đà Lạt brơi thâo:

 “Ƀing gơmơi ruah mă abih bang hơdôm gơnam leng kơ hmâo anăn pơčrang lăng phun akha, gơnam dưi hmâo Gơnong bruă sĭ mơdrô pơsit phrâo ba mut kiăng sĭ kơ mơnuih blơi yua. Hrom hăng anun, kiăng lăi pơhư̆č anăn gơnam kơ hơdôm bôh anom bơwih ƀong ƀing gơmơi hmâo pơjing laih mrô QR Code, pơlir nao rai hăng lăi pơthâo hơdôm plăng lăi pơhing, hrom hăng anun ƀing gơmơi glăk pơlir hăng taxi, sang jưh tuai kiăng lăi pơthâo hăng lăi pơhư̆č gru rŭp abih bang sunfood anai truh hăng tuai hyu čuă lăng”.

Grŭp pơphun Festival bơnga Đà Lạt tal 9 thun 2022 ăt hmâo pơphun laih Jơnum bơkơtuai bôh thâo phrâo ngă tui nua anăn gơnam plơi prong Festival bơnga Đà Lạt hăng kơnuih mơnuih Đà Lạt “rơ-un, klă, thâo jum tuai”. Bruă bơkơtuai hmâo pioh laih lu mông lăi pơthâo glăi, gum lăi hăng gum pơhiăp jum dar hơdôm tơlơi gah nua anăn gơnam plơi prong Festival bơnga Đà Lạt. Ơi Tôn Thiện San, Khua Jơnum min mơnuih ƀôn sang plơi prong Đà Lạt pơtŏng sit, hluai tui bruă mă Festival bơnga Đà Lạt, bruă pla bơnga dưi pơpŭ laih hăng pơtŏng sit anăn păn bơnga Đà Lạt jing anô̆ gơgrong kơjăp kiăng yua prăk pơđĭ kyar bruă pla bơnga.

 “Gah yŭ tơlơi ngă juăt hăng bôh thâo pơlir gơnong bruă, hơdôm hră pơ-ar, tơlơi kơsem min bôh thâo dưi bơkơtuai, pơblang, ngă rơđah bruă mă, nua yôm mơng anăn păn plơi prong Festival Bơnga Đà Lạt hăng kơnuih mơnuih Đà Lạt… Ƀing gơmơi đăo gơnang lĕ, pơ̆ anăp anai plơi prong Đà Lạt amra mă yua ba glăi bôh tơhnal gal, pran kơtang plơi pla đĭ kyar tañ, pơhlôm abih bang hăng kơjăp phik, djru lăp djơ̆ amăng tơlơi pơđĭ kyar hrom mơng kual Dăp Kơdư hăng đơ đam dêh čar”.

Festival bơnga Đà Lạt tal 9 thun 2022 truh abih lơ 31/12 mơng pơđut, ƀuăn hăng lu bôh yôm, jơlan hơdră pha ra kơ tuai hyu čuă lăng hăng mơnuih ƀôn sang plơi prong găn rơgao lăng, lăng hơdôm gơnam pơdă prưng. Amăng anun, hơdôm anih dưm bơnga dưi pơpha jum dar kual krah plơi prong amra pơdă prưng dong truh abih tết tui phiăn juăt./.