Amăng anun, Khul ia jrao kyâo bơrơkal mriah tơring čar Gia Lai gir run gum djru brơi 25.000 čô mơnuih, hăng abih tih prăk mă yua lĕ 15 klai prăk. Bruă pơphun “Tết khăp pap bơyan bơnga Quý Mão 2023” amra pok pơhai dong mơng lơ 1/1/2023 truh lơ 16/1/2023 ( anai lĕ mơng lơ 10 truh lơ 15/12 thun Nhâm Dần).

Bruă anai hơmâo jak iâu abih bang mơnuih gum pơgôp kiăng pơphun “Ƀơk gơnam-ngui Tết” mơng anun djru brơi gơnam tam, pơ alum pran jua kiăng mơnuih ƀun rin, sang anŏ tơnap tap ngui mơ-ak amăng bơyan bơnga, pơgôp pơjing plơi pla thâo gum pơgôp, thâo khăp pap tơdruă. Hơdôm bruă mă mơng tơlơi pơphun “Tết khăp pap” hơmâo pơphun tui phiăn juăt mơng gru grua mơnuih ƀon sang. Tơlơi anai amra ngă tui pran thâo gum djru amăng plơi pla kiăng mơnuih ƀon sang pơdah pran gơgrong gum djru mơnuih ƀun rin, sang anŏ tơnap tap.