Amai Th. sa čô đah kơmơi dŏ ƀơi phường Tây Sơn, plơi prong Pleiku phrâo nao pơ Anom bruă rơnuk rơnua plang internet hăng pơgăn ƀing ngă soh hăng boh thâo ia rơgơi phrâo, Kông an tơring čar Gia Lai, lăi pơthâo hăng ƀing kông an bruă ñu hơmâo arăng plư mă 160 klăk prăk. Rơgao mơng anai 2 hrơi, ñu hmư̆ arăng iâu telephôn lăi ñu hơmâo arăng brơi gơnam yua dah hlâo kơ anun ñu blơi gơnam pơ sang siêu thĭ sĭ gơnam măi mok. Kiăng dưi mă gơnam arăng brơi, amai Th. pơmut app telegram amăng telephôn ñu kiăng thâo pơhiăp nao rai. Tui hăng pô anai ruai glăi, ñu tut amăng glông link či ruah mă gơnam ñu kiăng, rim wơ̆t mơng 10.000 truh 40.000 prăk. Lơ̆m pô anai đăo laih, arăng plư ñu mơ-it prăk lu hloh či tuh pơ alin hơmâo prăk kơmlai mơng 40 truh 60%.

Amăng lơ 11/5, ñu hơmâo 10 wơ̆t mơ-it nao rơbêh 160 klăk prăk amăng 2 mrô pioh prăk, giong anun kah mơng thâo ñu djơ̆ kơđông arăng leč. Hơmâo thâo, akŏ thun 2023, tơring čar Gia Lai hơmâo pô arăng plư mă truh kơ 3 klai 500 klăk prăk. Rơngiao kơ tơlơi plư phrâo, hơdôm tơlơi plư ta juăt ƀuh kah hăng lăi pô ñu ngă kông an lăi pơthâo arăng ngă soh tơlơi phiăn, pơhŭi khoă hĭ sim, khoă hĭ mrô pioh prăk, mơ-it prăk brơi kông an hơduah ĕp kơđi; hyu leč mă mơnuih dêh čar tač rơngiao rơkâo ngă gơyut, brơi gơnam; jak mơnuih sĭ gơnam hrŏm, djru sĭ mơdrô apah prăk lu; jak iâu tuh pơ alin, brơi čan prăk online....ăt hơmâo ƀing plư ngă na nao mơn, yua hnun ăt hơmâo mơn pô djơ̆ kơđông. Amăng thun 2022, tơhan rơnuk rơnua plang internet tơring čar Gia Lai hơmâo hmư̆ 124 tơlơi lăi pơthâo arăng plư ƀong prăk, hăng mrô prăk rơngiă rơbêh 40 klai. Pô hơmâo arăng plư lu hloh lĕ rơbêh 10 klai prăk.