Ană plơi pla plơi Đê Kjiêng, să Ayun, tơring glông Mang Yang dưi jao wai lăng30 ha glai rưng mơ̆ng Glai kơnuk kơna pơgang Kon Ka Kinh. Bơyan phang adai pơđiă kơtang, krô krañ sui hrơi, hŭi biă mă apui jă ƀong glai. Kiăng pơhlôm hlâo, ƀing hlăk ai plơi Đê Kjiêng pơpha grup hyu tir sem lăng na nao, dăp hơdră hŭi hơmâo tơlơi truh apui ƀong glai kah hăng jah, rek đer treng glai anăm brơi apui ƀong rôk hyu prong. Ayong Măng, arăng jao ngă pô wai lăng glai amăng plơi lăi:

“Ƀing khua mua tơhan pơgang glai kơnuk kơna jao hơmâo pơtô laih kơ ană plơi pla khom wai pơgang glai klô, mơnuih ƀôn sang ngă tui djơ̆, tơdah hơmâo tơlơi hơgĕt thơ khom lăi pơthâo hăng anom bruă khua tơhan, lăi pơthâo pơgang glai kmrong mơtah mơda kiăng tơdơi anai, bơwih ƀong huă mơ̆ng bruă pơgang glai anun yơh djru kơ ta”.

Đang kyâo glai kơnuk kơna pơgang pioh Kon Ka Kinh hơmâo rơbêh 41 rơbâo ha, mơ̆ng tơring glông Đak Đoa truh pơ Mang Yang laih anun tơring glông Kƀang. Ơi Lê Văn Vinh, Kơ-iăng Khua wai lăng đang kyâo glai kơnuk kơna pơgang Kon Ka Kinh brơi thâo, mơ̆ng akŏ bơyan phang mơtam, anom bruă hơmâo pơpha tơhan mă bruă hyu tir na nao, hyu ĕp amăng glai, truh pơ plơi pla dŏ giăm glai ngă tui 4 mơta bruă sa anih pơgang glai, laih anun akŏ pơjing grup, khul ngă bruă pơgang apui ƀong glai. Amăng anun, sa črăn hơmâo mơnuih ƀôn sang djop plơi pla djru hrom, jah rơgoh ngă đer pơgăn apui rôk hyu amăng glai.

“Anom bruă gơmơi hơmâo pơtô lăi mơnuih ƀôn sang djop plơi pla, mơnuih ƀôn sang hơmâo lŏn hmua giăm glai, anăm čuh jơnah ôh, sit ngă hmua lĕ lăi pơthâo kiăng hơmâo hơdră pơhlôm pơgang tong ten, lăi pơthâo gong gai kơnuk kơna hăng tơhan pơgang glai rưng. Anom bruă ăt ngă tui lu hơdră pơgang apui ƀong glai kah hăng jah glông đer pơgăn apui ƀong glai, pong tơmeh ngă pơnang čih pơthâo ƀơi akiăng jơlan mut tơbiă amăng glai, rơngiao kơ anun ngă tui lu hơdră pơhlôm, pơgang tong ten hŭi apui jă ƀong rôk prong, ngă hrom djop să pô wai lăng glai rưng brơi kơtưn wai pơgang tong ten hloh”.

Amăng mrô 60 rơbâo ha glai rưng ƀơi Mang Yang, hơmâo 10 rơbâo ha hŭi biă mă apui ƀong kơtang, lu biă mă ƀơi să Ayun, să Hra, să Đêar, Đak Trôi, Đak Djăng. Tui hăng ơi Nguyễn Công Ngọc, Kơ-iăng khua anom bruă tơhan pơgang glai tơring glông Mang Yang, kiăng prăp lui bruă pơgang apui ƀong glai lĕ, tơring glông Mang Yang hơmâo akŏ pơjing khul grup mă bruă git gai truh pơ să, pơjing 4 mơta bruă ječ ameč sa anih, laih dơ̆ng akŏ pơjing grup mă bruă hmar hơprah, pơčruih apui ƀong glai, abih bang ding kơna truh rơtuh čô, phun ñu ăt mơnuih ƀôn sang djop plơi pla ngă hrom mơ̆ng blung a mơtam.

“Sit truh akŏ bơyan phang bruă mă pơhlôm pơgang apui ƀong glai pok pơhai ngă tui re se, pơtô lăi mơnuih ƀôn sang, djop sang bruă djru pơtrut pơsur, pơtă pơtăn abih bang khul wai pơgang, pô pơgang glai, jơnum min mơnuih ƀôn sang să anih hơmâo glai klô brơi gơgrong ba ngă bruă pơtô lăi truh mơnuih ƀôn sang djop plơi pla dŏ giăm glai. Anom bruă khua tơhan hơmâo phung mă bruă krăo lăng tui glông pơtă hlâo kiăng tañ ƀuh, tañ thâo lăi pơthâo mơtam hăng pô pơgang glai laih anun să hăng anom bruă tơhan pơgang glai đah mơ̆ng hmar nao hơprah apui, tañ pơgăn pơčruih apui ƀong glai anăm brơi rôk hyu prong.