Tui Jơnum min mơnuih ƀôn sang tơring čar Gia Lai, amăng ha mơkrah akŏ thun 2025, abih tih gơnam pơkra rai amăng tơring čar (GRDP) đĭ dưm dưm 7,5%. Anai lĕ mrô pơđĭ kyar lu ƀiă, sit biă ñu lơm tơring čar phrâo pơmut hrŏm anih anom mă bruă, kiăng hơmâo hrơi mông hơđong anih anom mă bruă hăng hơdră wai lăng.

Kơ ngăn drăp, abih tih ngăn drăp pơhrui kơnuk kơna rơbêh 13.600 klai prăk, đĭ lu pơhmu tui tơđar thun hlâo. Sit biă ñu, mrô prăk mơng Bình Định dưm dưm rơbêh 10.000 klai prăk, lơm Gia Lai hơđăp hơmâo 3.600 klai prăk. Rơnoh sĭ mơdrô pơ tač rơngiao đơ đam tơring čar giăm 1,7 klai đôlar Mi, đĭ kơtang. Kơnong Gia Lai (hơđăp) rơnoh sĭ mơdrô pơ tač rơngiao đĭ giăm dua wŏt, anai lĕ mơng sĭ kơphê, tơlơi anai pơtrut kơtang brơi gơnong bruă ngă hmua.

Tơlơi dưi prong mơng tơring čar Gia Lai phrâo ăt hơmâo mơng hơdôm akŏ bruă pơprong anun lĕ jơlan rơdêh đuăi hmar Quy Nhơn-Pleiku, tơdrun kompăn Phù Mỹ hăng ară jơlan plĕ trun, por đĭ mrô 2 ƀơi tơdron rơdêh por Phù Cát. Hơdôm ring bruă anai ƀu djơ̆ kơnong jing anih yôm phăn amăng pơđĭ kyar bơwih ƀong huă đôč ôh mơ̆ ăt pơgôp gêh gal jơlan đuăi nao rai, logistics, pơhưč tuh pơ alin mơng lŏn ia hăng tač rơngiao.

Samơ̆, tui ơi Hồ Quốc Dũng, Khua git gai Ping gah tơring čar Gia Lai, tơring čar tơdơi kơ pơmut hrŏm ăt bưp lu tơlơi lông, anŏ aka ƀu klă. Anun lĕ prong hloh lĕ jơlan glông, dơnao pơkŏng ia, ia jrao hăng pơtô pơjuăt aka ƀu ngă ha amăng plĕ. Tơlơi phara kơ hơdră wai lăng kơplah wah tơring čar hơđăp amra bơdjơ̆ nao bruă git gai wai lăng mơng tơring čar Gia Lai (phrâo). Kiăng pơsir hĭ anŏ aka ƀu klă anai, tơring čar Gia Lai hơmâo ba tơbiă tơlơi pơkă wai lăng phrâo, mă jơlan gah “Jao djơ̆ mơnuih-djơ̆ bruă-djơ̆ gơnam tam-djơ̆ hrơi mông-djơ̆ tơlơi glăm ba-djơ̆ bruă jao” jing tơlơi črâo ba. Tui anun, hơnong pơkă pơđĭ kyar bơwih ƀong huă-mơnuih mơnam hơmâo jao tong ten tơl rĭm boh să, phường, sit biă ñu hơdôm kual tơnap tap. Ơi Hồ Quốc Dũng lăi pơtong:

“Hăng tơlơi gir run lĕ thun anai kiăng pơđĭ kyar 8%. Pel ĕp glăi djop tơlơi tơnap tap, gun găn, hơdôm tơlơi dưi kiăng pok phư. Kiăng pơplih phrâo kơtang amăng tơlơi pơmĭn git gai anih anom mơng bruă wai lăng truh pơ bruă pơčeh phrâo, djru brơi mơnuih ƀôn sang, abih bang bruă mơng mơnuih ƀôn sang hăng anom bơwih ƀong sĭ mơdrô lĕ kiăng pơsir mơng ƀon lan. Lăng tơlơi dưi ngă hăng tơlơi tŭ ư mơng mơnuih ƀôn sang lĕ tơlơi pơkă brơi tơlơi truh kih bruă mă mơng rĭm čô mơnuih”.

Jơnum min mơnuih ƀôn sang tơring čar Gia Lai hơmâo ba tơbiă hơdôm hơdră bruă tong ten kiăng pơplih bruă git gai wai lăng. Akŏ phun amăng anun lĕ pơtrut pơplih yua boh thâo phrâo hăng yua boh thâo măi mok amăng wai lăng. Hơdôm boh tơhnal amăng wai lăng hăng hơnong pơkă bơwih ƀong huă-mơnuih mơnam hơmâo yua boh thâo phrâo amra djru brơi hơdôm boh să, phường amuñ ĕp lăng hăng pok pơhai bruă tong ten. Ơi Phạm Anh Tuấn, khua Jơnum min mơnuih ƀôn sang tơring čar Gia Lai lăi rơđah:

“Hơdôm gơnong bruă, anom bruă hơđong amăng jao bruă hăng pơpha hơnong pơkă tong ten amăng rĭm bruă brơi rĭm boh ƀon lan. Sit biă ñu ƀing khua apăn akŏ, kơ-iăng khua hơdôm gơnong bruă gơgrong ngă ba glăi tŭ yua hrŏm hăng hơdôm gơnong bruă ngă tui djơ̆ hơnong pơkă hơmâo jao, pơtô pơjuăt hăng črâo ba ƀon lan hơdră pok pơhai ngă tui hơmâo pơsir hĭ bruă kơ mơnuih ƀôn sang hăng pơđĭ kyar bơwih ƀong huă-mơnuih mơnam. Hơdôm boh tơhnal anai kiăng yua boh thâo phrâo kiăng hơdôm boh să, phường hluai tui hơdôm bruă, lăng nao ƀơi anun kiăng thâo pơsir hĭ bruă”. /.