Kiăng hơmâo boh tơhnal tŭ yua klă hăng hơđong hrĕ apui lơtrik, djop sang bruă pơkĕ yua apui lơtrik hơmâo ngă tui lu hơdră pơgang klă gong apui lơtrik hăng hrĕ dăng nao pơ kual plơi pla laih anun anih pơkra ming hơmâo pơkĕ lu rơnoh apui lơtrik; pơtrut ba yua boh thâo ia rơgơi phrâo, anăp nao akŏ pơdong hăng pơđĭ kyar yua apui lơtrik rơgơi, hơđong.

Gia Lai hơmâo hrĕ apui lơtrik 500 KV hăng 220 KV glông 800 km, găn rơgao nao pơ lu đang hmua mơnuih ƀôn sang djuai ƀiă. Yua kơ nao pơtô lăi re se kiăng thâo hluh pơgang tơlơi rơnuk rơnua đơ jơlan hrĕ apui lơtrik dăng nao, abih bang thâo hluh hăng glăm ba amăng bruă mă, gum tơngan hrom mơ̆ng anom bruă apui lơtrik pơgang hơđong hrĕ apui lơtrik. Ayong Rmah Čơn, plơi Breng 2, să Ia Dêr, tơring glông Ia Grai, Gia Lai hơmâo 2 ha kơphê giăm jolan hrĕ apui lơtrik 500 kv găn nao ñu lăi:

“Kâo hơmâo hmua kơphê gah yŭ glông hrĕ apui lơtrik, kâo pô hăng sang anŏ ngă tui djơ̆ tơlơi pơtrun mơ̆ng kơnuk kơna pơgang rơnuk rơnua jơlan hrĕ apui lơtrik. Mơ̆ng anun kâo hăng sang anŏ ăt lăi pơthâo ană plơi pla amăng plơi anăm klĕ dŏp ôh gơnam hrĕ apui lơtrik, hơdôm sang anŏ hơmâo hmua kơphê, pla boh čroh gah yŭ glông hrĕ apui lơtrik ăt khom ngă djơ̆ tơlơi phiăn pơkă hnong rơnuk rơnua hrĕ apui lơtrik”.

Gah anom bruă pơkĕ apui lơtrik, anom bruă hơmâo sem lăng na nao tơlơi hơđong lơ̆m pơkĕ apui ơtrik, tuh pơ alin blơi măi por UAV kiăng hyu ĕp lăng hrĕ apui lơtrik huăi kiăng hơmâo mơnuih đĭ nao ĕp tui hăng hlâo, djop mơta ĕp lăng tui boh thâo ia rơgơi Hotline kiăng huăi pơthăm apui lơtrik lu wơ̆t. Boh nik ñu, ƀơi djop anih dưm măi ngă pơtơdu čơtăng apui lơtrik, mơnuih mă bruă hăng ƀing kơhnâo kơhnăk dŏ mă bruă pơ anih bruă na nao hrơi mlam pơblih nao rai, pioh ming pơkra, pơsir mơtam tơdah hơmâo tơlơi răm truh hơgĕt thơ.

Ayong Trần Văn Trang, Khua grup dŏ krăo lăng bruă mă măi pơtơdu čơtăng apui lơtrik 500 kV Plei Ku 2, mơ̆ng sang bruă pơkĕ apui lơtrik Gia Lai lăi:

“Bơyan anai hrĕ apui lơtrik jua čơtăng biă mă, mơ̆ng 80-90% rơnoh pơkĕ yua anun yơh adơi ayong mă bruă khom dŏ krăo lăng mă bruă na nao. Lơ̆m hrĕ apui lơtrik či bơbeč sat lĕ, hŭi ba truh tơlơi răm pơkŏn lơ̆m pơkĕ yua khom thâo hlâo. Ră anai, amăng măi komputer ƀuh ba mơtam, djop mơta bruă mă, mơnuih dŏ mă bruă, kơnong sem lăng abih bang thâo mơtam yơh. Tơlơi hơgĕt hơmâo mơ-it tơlơi pơhing amăng măi komputer laih anun sem lăng abih bang djop, hlơi dŏ mă bruă,git gai brơi pơsir mơtam anun tañ hloh”.

Tui hăng ơi Trần Khánh Trung, Kơ-iăng Khua anom bruă pơkĕ apui lơtrik Gia Lai, hrom hăng 783 km jơlan hrĕ apui lơtrik 220 kV hăng 500 kV, anom bruă gơñu dŏ wai lăng 2 boh anih pơtơdu čơtăng apui lơtrik 500 kV, 1 boh anih pơtơdu 220 kV. Anom bruă hơmâo ba yua boh thâo ia rơgơi phrâo soh pioh wai lăng, mă yua. Mơ̆ng anun, pơhrŏ ƀiă rơnoh prăk tuh pơ alin kơ bruă mă:

“Amăng thun 2022, kông ty pơkĕ apui lơtrik 3 jing anom bruă ba jolan hlâo mơ̆ng phun akha kông ty ba yua măi anŏ por ĕp lăng UAV sem lăng hrĕ apui lơtrik. Kơčăo bruă kơsem min man pơdong pơkra anih pơtơdu čơtăng apui lơtrik rơgơi, mă yua amuñ hăng tañ hmar, gêh găl kơ mơnuih mă bruă git gai. Hơdôm boh tơhnal kơsem min anai ngă tui amăng bruă mă hơmâo pơblih lu hơdră mă bruă, ba tơlơi pơhing phrâo pơjing rai hơdră bruă pơblih phrâo mơ̆ng thun 2021-2025 mơ̆ng phun kông ty pơkĕ yua apui lơtrik dêh čar lăi hrom hăng kông ty pơkĕ apui lơtrik 3 hnun mơ̆n”.