Adơi Hoàng Thị Anh Thơ - hrăm anih 12C1, Sang hră gưl 3 Phạm Văn Đồng - să Ia Sao, tơring glông Ia Grai, tơring čar Gia Lai brơi thâo, pơplông pơ anăp anai yôm biă hăng tơlơi hơdip tơdơi anai mơ̆ng ñu. Yua hnun, ñu gir hrăm, hơdor glăi djŏp tơlơi hrăm tañ ƀiă đah mơ̆ng hơmâo puang lu:“Kâo hơmâo rơkâo hrăm apah pơ sang dong či pơkra ƀai. Dua dơ̆ng lĕ ƀong huă, đih pơdơi klă kiăng hơmâo pran či hrăm. Bruă rơkâo pơplông gưl prong hơmâo nai sang hră pơtô brơi rơđah laih, lăng glăi hră pơ-ar lu wơ̆t. Anun jing bruă ngă hră pơ-ar pơplông kâo hơmâo ngă giong laih”.

Lăi nao bruă prăp rơmet ƀơi anih pơplông mrô 11 mơ̆ng tơring čar Gia Lai, nai pơtô Nguyễn Trọng Tuấn - Kơ-iăng khua gơgrong bruă Sang hră gưl 3 Phạm Văn Đồng, să Ia Sao, tơring glông Ia Grai brơi thâo:“Truh mông anai, 186 čô čơđai hơmâo ngă giong abih laih bruă čih anăn pơplông amăng glông phần mền. Kơ anih anom, gơnam tam, sang hră prăp lui djŏp 12 anih pơplông, anih pioh tơlơi ba pơplông, anih ngă bruă mơ̆ng ƀing nai wai lăng; apui lơtrik, bruă pơgang apui ƀong ăt hơmâo pel ĕp, pơkra ming mơn”.

Bơ ƀơi Sang hră gưl 3 Hà Huy Tập, tơring glông Kông Chro, nai Phạm Hữu Hùng - Khua sang hră brơi thâo, thun anai anih pơplông hơmâo 57/246 čô čơđai jing mơnuih djuai ƀiă. Hrŏm hăng pơhlôm bruă pơtô hơdor glăi tơlơi hrăm wơ̆t hăng prăp lui gơnam yua, sang hră ăt prăp lui anih ƀong huă, đih pơdơi kơ ƀing čơđai mơ̆ng ataih:“Sang hră ngă hră pơ-ar mơ-it kơ Jơnum min mơnuih ƀôn sang tơring glông rơkâo djru ba rim čô čơđai 400.000 prăk amăng 3 hrơi pơplông. Gah bơnah sang hră, git gai hlăk ai ngă hrŏm hăng Khul hlăk ai tơring glông lăng ba 57 čô čơđai djuai ƀiă ƀong huă ƀơi sang hră hlao. Rim thun, wơ̆t hăng thun anai hnun mơn, sang hră hơmâo 12 anih dŏ pioh kơ ƀing čơđai tơnap tap rơkâo dŏ glăi. Ƀing hlơi ƀu rơkâo dŏ glăi lĕ hơmâo grup djru bơyan pơplông djru pơgiăng ƀing čơđai nao rai”.

Him lăng tal pơplông abih anih 12 thun 2024 anai, Gia Lai hơmâo 15.200 čô čơđai. Amăng anun, rơbêh 14.400 čơđai glăk hrăm anih 12, 800 čô čơđai mơ̆ng rơngiao rơkâo pơplông. Tơring čar prăp brơi 41 anih pơplông sit nik, hăng hơdôm anih pơhlôm hlâo ƀơi 17 boh tơring glông, plơi prong. Gơnong bruă pơtô hăng pơjuăt tơring čar Gia Lai ngă hrŏm kjăp hăng kông an, ia jrao, apui lơtrik...prăp lui pơhlôm rơnuk rơnua amăng tal pơplông. Bruă pơtô ba tơlơi phiăn, tơlơi pơkă lơ̆m pơplông, glông phần mềm wai lăng pơplông, ngă hră pơ-ar pơplông kơ rơbêh 15.200 čô čơđai lêng kơ hơmâo ngă giong laih. Ơi Nguyễn Văn Long - Kơ-iăng khua gơnong bruă pơtô hăng pơjuăt tơring čar Gia Lai brơi thâo dơ̆ng:“Mơ̆ng anai truh kơ hrơi pơplông, gơnong bruă lăng glăi abih anăn ƀing čơđai pơplông, pơtô brơi bruă wai lăng hrơi pơplông, jao bruă rơđah rơđông kơ ƀing nai pơtô, mơnuih wai lăng ƀing čơđai nao pơplông. Hơdôm bruă anai amra hơmâo ngă na nao, mơ̆ng anai truh kơ hrơi pơplông mơtăm. Gơnong bruă pơtô hăng pơjuăt ngă hrŏm hăng Jơnum min mơnuih ƀôn sang tơring glông pơtŏng glăi rơđah rim anih pơplông, mơ̆ng gơnam yua, apui lơtrik truh kơ tơlơi kiăng mơ̆ng ƀing čơđai đah mơ̆ng thâo djru lăp djơ̆”.

Hăng bruă prăp rơmet klă, Gia Lai glăk anăp nao tal pơplông abih anih 12 thun 2024 rơnuk rơnua hăng lăp djơ̆./.