Lơ 5/7, Khul apăn bruă Ping gah tơring čar Gia Lai pơphun jơnum tal 16 (pok prong). Tui tơlơi pơhing mơng tal jơnum anai brơi ƀuh, mrô prăk tuh pơ alin man podong amăng tơring čar dŏ aset, kơnong 22,45% hăng glăk bưp lu tơnap tap. Thun anai, tơring čar Gia Lai hơmâo jao rơbêh 4.300 klai prăk tuh pơ alin man pơdong hăng mrô prăk jao sit nik giăm 3.800 klai prăk. Samơ̆, mrô prăk jao tuh pơ alin amăng tơring čar kơnong 22,4%. Kơnong 3 jơlan hơdră tui hơnong pơkă dêh čar amăng man pơdong plơi pla phrâo, pơhrŏ trun ƀun rin hăng pơđĭ kyar bơwih ƀong huă mơnuih mơnam kual mơnuih djuai ania ƀiă, mơng 15-23%.

Tui khua mua lăi pơthâo amăng mông jơnum, bruă dưm dăp mă yua lŏn mơnai amăng tơring čar aka ƀu pơplih, tơlơi anai ngă kaih amăng jao prăk. Ră anai hơdôm akŏ bruă akŏ phun amăng tơring čar anun lĕ Jơlan wer bơwih ƀong gah Ngŏ, hơdôm dơnao pơkŏng ia, man pơdong plơi pla kual mơnuih djuai ania ƀă lêng kơ kaih yua bơdjơ̆ nao bruă anai. Hrŏm hăng anun, rơnoh prăk yua lŏn mơnai dŏ aset pơhmu hăng hơnong pơkă ăt lĕ tơlơi ngă tơnap. Lu ring bruă mă yua mơng rơnoh prăk anai hơmâo man pơkra giong samơ̆ aka ƀu hơmâo prăk duh.