Amăng hơdră nao čuă jơmư laih anun jơnum khua mua djop dêh čar pơhiăp tơlơi Prang tal 19 laih anun čuă jơmư sit nik dêh čar Prang mơ̆ng lơ 3-7/10/2024, mơguah lơ 4/10, tui hăng mông dêh čar Prang, ƀơi Paris, Khua git gai ping gah, Khua mir sir ơi Tô Lâm hơmâo tŭ jum Khua pơ ala Khul khua mua mua anom bruă sĭ mơdrô dêh čar Prang, Khua pơlir hơbit djop anom bruă iâu pơmut mơnuih mă bruă dêh čar pơhiăp tơlơi Prang, khua akŏ pơdong anom bruă Notus Technolgies.

Ƀơi mông bưp nao rai, Khua git gai ping gah, khua mir sir ơi Tô Lâm rơkâo, Khul djop anom bruă sĭ mơdrô khul ngă khua mua anom bruă sĭ mơdrô dêh čar Prang ăt djru ba hăng pơtruh brơi bruă tuh pơ alin sĭ mơdrô plah wah anom bruă sĭ mơdrô dua boh dêh čar pơ anăp anai; Lăi pơtong Việt Nam hơmâo jơlan hơdră pơhưč bruă ngă hrŏm, ruah mă boh tŭ yua, tŭ mă boh thâo ia rơgơi phrâo pơgang ayuh hyiăng anih dŏ jum dar jing anăp mă bruă phun. Khua git gai ping gah, khua mir sir ơi Tô Lâm lăi pơtong, Việt Nam ƀuăn amra hrŏm hăng  djop anom bruă laih anun ngă gêh găl brơi abih bang ding kơna khul ngă bruă sĭ mơdrô mơ̆ng dêh čar Prang lăi pha laih anun anom bruă tuh pơ alin mơ̆ng dêh čar tač rơngiao hnun mơ̆n tơdah nao tuh pơ alin hơmâo boh tŭ yua ƀơi Việt Nam hăng ngă bruă tŭ yua sit nik ƀơi Việt Nam.