Đơ đam plơi prong Đà Lạt ăt dưi pok pơhư prong tui truh 9 wơ̆t pơkă hăng ră anai. Jơnum lok 19 khua mua pơ ala mơnuih ƀôn sang tơring čar Lâm Đồng tal X pơphun lơ 4/10 hơmâo pơsit tui gru pơkă ming pơkra glăi abih bang pơkă hnơ̆ng plơi prong Đà Lạt truh thun 2045. Bruă ming pơkra glăi anai kiăng djơ̆ lăp hăng anŏ kiăng amăng bruă mă ră anai laih anun lăng nao pơ anăp adih dĭ da gla kơñ, ăt kah hăng pơsir hĭ tơlơi gun kơƀah, kơđông jơlan rô nao rai, boh nik ñu kual amăng lăm plơi prong Đà Lạt. Tui hăng gru tơhnal pơkă phrâo, pơkă glăi plơi prong Đà Lạt ƀôn prong phrâo hơmâo guai sô̆ hăng hơdôm tơring glông Lạc Dương, Đơn Dương, Đức Trọng hăng sa črăn tơring glông Lâm Hà ƀơi kual lŏn kơdư dlông truh 850 met pơngŏ pơkă hăng jơlah ia rơsĭ, đơ đam ƀôn prong abih bang lŏn glai hơmâo 336.000 hektar.

Amăng anun, kual lŏn tong krah pok prong truh pơ tơring glông Dam Rông. Gru rek tơhnal pơkă phrâo anai, sa bruă pơkă hnơ̆ng phun yôm pơtrut pơđĭ kyar man pơdong tơring čar Lâm Đồng, kiăng ngă djơ̆ lăp hăng bruă git gai wai lăng hăng pơđĭ kyar bơwih ƀong huă kơ mơnuih mơnam, gru grua hiam anih rơhuông adai kơ plơi prong, hơdră man pơdong pưk sang đang hmua, čuk pơkra jơlan glông nao rai amăng Đà Lạt hăng anih anom ieo gah. Laih dơ̆ng pơgang lŏn adai glai klô, anih mơnong mơnuă hơdip hơmâo hơjăn phara mơ̆ng Đà Lạt kiăng pơđĭ kyar jing plơi prong phrâo rơnuk anai samơ̆ ăt djă pioh gru grua hiam mơ̆ng đưm, pơhưč bruă man pơdong plơi prong, đĭ nao kiăng jing plơi prong hiam tŭ yua rơnuk phrâo.