Tui lăi pơthâo amăng mông mă bruă, mơng thun 2020 truh thun 2022, tơring čar Dak Lak hơmâo rơkâo mă yua mơng ngăn drăn, hăng mrô prăk 986 klai 632 klăk prăk brơi kơ bruă pơgang klin Covid-19. Tơring čar ăt hơmâo jak iâu pơgôp hăng tŭ mă mơng hơdôm khul grup, ƀing mơnuih amăng lŏn ia hăng tač rơngiao 71 klai 355 klăk prăk. Mơng rơnoh prăk anai, hơdôm anom bruă hơmâo gơgrong pok pơhai bruă blơi gơnam măi mok, jrao kiăng pơhlôm kơ bruă pơgang klin Covid-19 ƀơi ƀon lan. Gơnong bruă ia jrao tơring čar Dak Lak ăt đing nao pơtô hrăm brơi ƀing nai ia jrao ƀơi ƀon lan hăng bruă wai pơgang. Mơng anun hrưn đĭ klă dong bruă pơgang klin, tañ ƀuh, pơphun nao pơgang, pơgăn klin kheng hmao tlôn.

Ơi Dương Thanh Bình, Khua anom bruă djru mơnuih mơnam-Jơnum min apăn bruă Khua pơ ala mơnuih ƀon sang dêh čar pơtă pơtăn tơring čar kiăng lăng glăi dong bruă ba sa, dua boh anom bruă ia jrao glăi pơ tơring čar wai lăng; ngă rơđah tơlơi gơgrong mơng sang ia jrao să, phường hăng bruă khăm pơjrao tui hrăm pơhlôm nua ia jrao; hrưn đĭ klă dong amăng bruă khăm pơjrao mơng sang ia jrao tơring glông kiăng plai ƀiă mơnuih duam ruă ba nao tơring čar; đing nao dong bruă tuh pơ alin brơi hơdôm sang ia jrao hăng bruă khăm pơjrao ƀơi ƀon lan amăng tơring čar.