Amăng giăm 3.000 čô hlăk ai amăng tơring čar Dak Lak nao ngă tơhan tal anai hơmâo 2.502 čô arăng iâu nao ngă tơhan hăng 466 čô lĕ mut nao ngă tơhan kông ang. Amăng mrô anai, giăm 15% mrô hlăk ai hrăm gưl prong, cao đẳng, trung học chuyên nghiệp; sit biă ñu lĕ hơmâo 3 čô đah kơmơi. Bơ ƀơi Dak Nông, thun anai hơmâo 852 čô hlăk ai nao ngă tơhan hăng 265 čô mut nao ngă tơhan kông ang.

Mông jao tơhan ƀơi tơring čar Dak Nông pơphun yôm phăn ƀơi 8 boh tơring glông, plơi prong amăng tơring čar, anai lĕ hrơi nao ngă tơhan. Tơring čar ăt ngă klă tui hơdră djru tui tlôn khul ling tơhan, sit biă ñu lĕ tơña bla, pơ alum pran jua mơnuih ƀon sang hơđong amăng tơlơi pơmĭn, prap nao ngă tơhan.

Ƀơi tơring čar Gialai, tal jao čơkă ling tơhan thun anai hmâo 2.250 cô hlăk ai nao ngă tơhan, 400 čô nao ngă kông ang mơnuih ƀôn sang, 30% lĕ čih hră rơkâo mă pô nao ngă tơhan. Tui hăng Khul ruah ling tơhan, hơdôm tơring glông, plơi prong amăng tơring čar Gialai hmâo laih rơwang bruă pơhlôm hlâo mrô tơhan kiăng jao djơ̆ hăng djop, pơhlôm klă, pơhlôm kơjăp.

Bơ̆ ƀơi Kontum, amăng mơguah lơ 8/2, abih bang 10 bôh tơring glông, plơi prong mơng tơring čar Kontum ha amăng plĕ pơphun ngă Lơphet jao ling tơhan thun 2023. Amăng mrô 754 čô mơnuih mơng tơring čar Kontum nao ngă tơhan hmâo 19 čô mơnuih čih hră rơkâo mă pô, 4 čô đah kơmơi hăng 12 čô mơnuih hrăm giong gưl dlông, cao đẳng. Tơlơi suaih pral ƀing tơhan phrâo ruah dăp mrô sa hmâo rơbêh kơ 60%. Hăng tơlơi prăp lui tŏng ten djop mơta, Ngă lơphet jao čơkă tơhan thun 2023 ƀơi hơdôm bôh tơring glông, plơi prong mơng tơring čar Kontum, leng kơ pơphun amăng tơlơi tơpă, pơđao, sit nik jing hrơi jơnum ling tơhan phrâo ruah mơng hlăk ai ƀơi jơlan nao ngă tơhan pơgang lŏn ia./.