Ƀrô djơ̆ tal hơdor glăi 78 thun hrơi pơdŏng Khul ling tơhan dêh čar Việt Nam, mơguah lơ 21/12, Grŭp khua pơ ala anih jưh, Ƀirô gum bruă pơgang lŏn ia, hơdôm bôh ƀirô nao hrom, anom bơwih ƀong, Khul mơnuih Khmer – Việt Nam ƀơi Kur hmâo nao dưm laih guang bơnga, tuĭ ñang ƀơi Gong kut Giăng mah Việt Nam hăng Kur, plơi prong jưh jom Phnom Penh.

Anai lĕ bruă mă tui phiăn juăt kiăng hơdor glăi tơlơi pơsăn drơi prong prin mơng ƀing ling tơhan gum djru mơng Việt Nam ƀơi dêh čar Kur. Rơgao kơ anai ăt djru pơtô juăt mơn hăng lăi pơthâo truh hơdôm rơnuk hlăk ai, kiăng djă pioh hăng ngă tui hloh dong hơdôm gru grua phiăn juăt klă hiam mơng Khul ling tơhan mơnuih ƀôn sang Việt Nam, ăt kah hăng djru ngă kơjăp tui tơlơi rô nao rai kơplah wah Việt Nam hăng Kur jai hrơi jai klă hiam./.