Mut amăng web dulich.daknong.gov.vn, ƀing ta dưi hyu lăng tlâo bơnah kơ Dơnao Tà Đùng ƀuh mơtah mơda kar hăng tơlơi jak iâu pơhưč tuai čuă ngui pơ Dak Nông. Amăng web anai, tuai čuă ngui dưi pel ĕp hơdôm anih čuă ngui mơ-ak hloh amăng tơring čar, hơmâo arăng lăi pơthâo brơi hơdôm tour čuă ngui, anih đih pơdơi pran, ba hyu tuai, ngui ngor, ƀong mơñum…Anai lĕ hơdôm bruă bơwih brơi tuai rơgơi amăng tơring Dak Nông phrâo hơmâo mă yua lông lăng dong mơng lơ 15/12/2022. Him lăng tơdơi kơ 3 blan ngă lông lăng, hluai tui tơlơi pơhrăm glăi hăng pơgiong tui ƀơƀrư̆, hơdôm tơlơi anai amra mă yua sit nik djru mă yua, pơđĭ kyar bơwih brơi tuai čuă ngui. Tuai čuă ngui dưi rơkâo lui hlâo hrơi mông amăng plang internet, lăng tour, hơmâo arăng lăi pơthâo hơdôm bruă bơwih brơi tuai tui hơdră thâo rơgơi anai.

Gum hrŏm hăng gong gai ƀon lan pơjing hăng pơđĭ kyar bruă bơwih brơi tuai čuă ngui thâo rơgơi lĕ anom bruă dăng kông ling tơhan Viettel Dak Nông. Ơi Nguyễn Anh Tuấn, Kơ-iăng khua hơdră yua boh thâo phrâo, pôr pơhing Viettel Dak Nông brơi thâo:

“Plang anai amra djru brơi gơnong bruă gru grua,bơrơguăt drơi jăn-tuai čuă ngui Dak Nông lăi pơthâo gơnam tui gru grua, bơwih brơi tuai čuă ngui amăng tơring čar. Hăng ƀing tuai amra nao pel ĕp, hyu čuă lăng gru grua čuă ngui 3D hăng rup rap pơdah lăng hlâo kơ nao pơ Dak Nông”.

Hrŏm hăng bruă pơđĭ kyar bơwih brơi tuai čuă ngui thâo rơgơi, tơring čar Dak Nông glăk gum hrŏm hăng Anom bruă kơsem min hăng boh thâo măi mok Việt Nam pok pơhai pơjing lơkak bơwih brơi tuai čuă ngui điện tử tơring čar Dak Nông. Anai lĕ tơring čar blung a ƀơi kual Dap kơdư ngă tui bruă pơjing hră lơkak điện tử bơwih brơi tuai čuă ngui. Tui anun, hră lơkak amra črâo brơi mơnuih mut nao lăng, hyu ĕp anih bơwih brơi tuai čuă ngui, hơmâo wŏt bruă črâo brơi jơlan glông: rơdêh đĭ nao rai, hơdôm anih brơi yua rơdêh apah, lăi pơthâo hrơi mông ngui ngor, ngă yang rơbang ƀudah hơdôm tour bơwih brơi tuai čuă ngui glăk trun nua.. Thạc sĩ Đào Thị Lưu, Anom bruă kơsem min hăng boh thâo phrâo Việt Nam brơi thâo, hră lơkak tuai čuă ngui điệt tử Dak Nông čih pơkra lăp djơ̆ hăng tơlơi sit nik ƀơi ƀon lan, dưi mă yua abih tơlơi gal.

“Hră lơkak điệt tử mơng tơring čar Dak Nông, ƀing gơmơi mă yua rup rap pơčrang mơng êgrăng Sentinel hơmâo mơ-it trun 5 hrơi ha wŏt, mơng anun djru amăng bruă krăo lăng hơdôm anŏ pơplih amăng kual mơ̆ ƀing gơmơi ƀu kiăng nao tơl anih. Ƀing gơmơi kơnong lăng amăng rup amra ƀuh abih anŏ pơplih kiăng mơng anun ba tơbiă tơlơi pơhŭi, him lăng hlâo hăng hơmâo hơdră pơsir hmao tlôn. Hăng hră lơkak ăt hơmâo wŏt tơlơi čih mơ-it kiăng kơ tuai čuă ngui hơmâo hơdôm tơlơi pơgôp”.

Mă yua hơdôm tơlơi dưi mơng Kual lŏn apui kơdir rŏng lŏn tơnah UNESCO, truh ră anai, Jơnum min mơnuih ƀon sang tơring čar Dak Nông hơmâo dưm dăp man pơdong hăng tuh pơ alin man pơkra 44 anih čuă ngui tui 3 anăn phun anun lĕ: “Tơlơi hing ang mơng apui hăng ia”, “Jua mơñi mơng jua angĭn phrâo” hăng “Jua mơñi mơng lŏn tơnah”. Tui hrơi mông pok pơhai amăng pơplih mă yua boh thâo phrâo amăng bruă bơwih brơi tuai čuă ngui dong mơng 2020-2025, tơring čar Dak Nông đing nao mă yua boh thâo phrâo hloh kiăng hrưn đĭ tŭ yua amăng bruă wai lăng, lăi pơthâo gru grua, pơhưč tuai čuă ngui hăng hơdôm anom bơwih ƀong sĭ mơdrô, anom bruă tuh pơ alin. Yă Khúc Thị Thoi - Kơ-iăng khua gơnong bruă gru grua, bơrơguăt drơi jăn hăng tuai čuă ngui tơring čar Dak Nông brơi thâo:

“Ƀing gơmơi rơkâo tơlơi črâo trun mơng Jơnum min mơnuih ƀon sang tơring čar kiăng pơjing hrơi blan pok pơhai akŏ bruă bơwih brơi tuai čuă ngui rơwang thun 2022-2025. Sit biă ñu pơjing phần mềm hơmâo hơdôm app amăng măi telephôn rơgơi, tơdơi anun amra pơmut glăi hơdôm anih bơwih brơi tuai čuă ngui, anih đih pơdơi pran, gơnam tam, anih ngui ngor…Jing anih djă pioh hrŏm amăng đơ đam tơring čar amăng bruă bơwih brơi tuai čuă ngui”.

Hăng lu anih hiam, gru grua yôm phara, hơmâo kual lŏn apui kơdir rŏng lŏn tơnah UNESCO Dak Nông - kual lŏn hơmâo lu tơlơi hing ang mơ-ak, Dak Nông pơhưč tuai nao lăng, hyu čuă hơdôm kual lŏn phrâo. Mă yua, ngă tui hơdôm tơlơi dưi, tơring čar hơmâo hơnong pơkă truh thun 2025 hơmâo ƀiă biă mă ñu 1 anih bơwih brơi tuai tui hơnong pơkă gưl dêh čar, hăng 5 kual, anih čuă ngui prong gưl tơring čar pơ glông. Čang rơmang hơdôm tơlơi yak nao phrâo amăng mă yua boh thâo phrâo, bruă bơwih brơi tuai čuă ngui Dak Nông amra pơplih phrâo, jing anih čuă ngui rơnuk rơnua, pơhưč lu tuai amăng lŏn ia hăng tač rơngiao./.