Kơnong kơ jơlan hơdră “Blan klâo guai dêh čar” gơnong dlông hơmâo pơphun ƀơi 3 boh tơring čar Lạng Sơn, Quảng Trị hăng Kiên Giang. Jơlan hơdră “Blan klâo guai dêh čar” pơƀut pơtô pơblang kơ khul hlăk ai, tơdăm dra kơ gru grua đưm, tơlơi khăp kơ lŏn ia laih anun tơlơi gơgrong bruă mơng hlăk ai hăng lŏn ia, rơnuk rơnua guai dêh čar, bul pơtâo ia rơsĭ.

Ƀơi anai hơmâo lu gơnam yôm hơmâo Anom pơphun jơlan hơdră brơi kơ tơhan pơgang guai, mơnuih ƀon sang hăng hlăk ai čơđai anet ƀơi hơdôm boh tơring giăm 3 boh tơring čar Lạng Sơn, Kiên Giang, Quảng Trị kah hăng: brơi gơnam kơ sang anŏ hơmâo anăn kơnuk kơna djru hăng čơđai sang hră tơnap tap, brơi hla gru Lŏn ia kơ hơdôm boh sang anŏ pơgang ba jơlan guai, djru brơi anah phun kram pioh pla tui hơbô̆ bruă “Phun kram ƀơi guai dêh čar Việt”. biă ñu, pơphun hơdôm ring bruă “Tŭi rơđah jơlan guai”, jơlan mut hyu tir, “Sang hră hiam kơ ƀing čơđai”, ring bruă “Sang juă glai brơi ƀing čơđai”...Hơdôm nua gơnam, ring bruă hơmâo pơkra amăng Jơlan hơdră anai rơbêh 7 klai 200 klăk prăk.