Jơlan hơdră ngui adôh suang pioh hơdor glăi 80 thun ba tơbiă črăn hră gru grua Việt Nam
Thứ tư, 10:23, 01/03/2023
VOV/Siu Đoan Pơblang
VOV/Siu Đoan Pơblang
VOV4.Jarai- Mơmŏt (28/2) ƀơi Sang ngui adôh suang plơi prong jưh jom Hà Nội, Jơlan hơdră ngui adôh suang yôm phăn pioh hơdor glăi 80 thun ba tơbiă črăn hră gru grua Việt Nam pơphun hơmâo Khua dêh čar ơi Phạm Minh Chính hrŏm hăng ƀing khua mua, hơmâo khua mua Ping gah, Kơnuk kơna, Jơnum min djop djuai ania mơnuih mơnam Việt Nam hơđăp dong.
Đĭ pơhiăp amăng mông ngă lơphet, Khua dêh čar ơi Phạm Minh Chính lăi pơtong, gru grua lĕ tơlơi tŏ tui na nao, ƀu pơdơi mah găn rơgao thun blan glêh tơnap mơng rĭm djuai ania, rĭm boh dêh čar hăng ană mơnuih. Gru grua djuai ania lĕ bơngăt mơng rĭm djuai ania, anai lĕ hơdôm yôm mơng gơnam tam hăng bơngăt mơ̆ djuai ania anun pơčeh rai mơng djop rơnuk.
Khua dêh čar pơsit tong, gru grua djuai ania Việt Nam - hăng hơdôm rơbâo thun - hơmâo hăng amra lĕ jing pran kơtang dŏ na nao mơng djuai ania. Mơnuih ƀon sang Việt Nam khŏm gơgrong, pơ-ư ang, djă pioh hăng lăi pơthâo gru grua djuai ania hơđong kjăp, lăp djơ̆ hăng rơnuk phrâo, anun lĕ gru grua Việt Nam yôm phara, hiam klă.
Viết bình luận