Ring bruă man pơkra jơlan wer gah Dơnung plơi prong Bảo Lộc (Lâm Đồng) lĕ ring bruă pơhrua amăng akŏ bruă pơkra ming jơlan mrô 20 găn nao 2 boh tơring čar Đồng Nai hăng Lâm Đồng tui hơdră BT (anun lĕ man pơkra-jao glăi). Jơlan glông 15 km hăng rơnoh prăk tuh pơ alin pơplih glăi lĕ rơbêh 720 klai, man pơkra dong mơng blan 2/2017.

Tơdơi kơ man pơkra giong 70%, glông jơlan anai khŏm pơdơi hĭ jang jai amăng rơnuč thun 2020 yua abih prăk tuh pơ alin, him lăng kiăng rơbêh 183 klai dong kiăng tŏ tui man pơkra. Mah tơring čar hơmâo tŭ ư kah pha rơnoh prăk mơng ngăn drăp ƀon lan kiăng pơhrua man pơkra jơlan samơ̆ dŏ gun găn kơ hơdră bruă yua anun truh ră anai Ding jum wai lăng jơlan glông ăt aka ƀu hơmâo hơdră pơsir hĭ. Bruă jơlan pơdơi man pơkra amra ba truh lu tơlơi sat, ngă jơlan răm rai hăng hơ-ưi prăk man pơkra hlâo anun.