Mơ̆ng akŏ thun truh ră anai, tơlơi truh lŏn adai ngă kơ 14 čô mơnuih djai, rơngiă aka ƀu ĕp ƀuh laih anun răm rai gơnam tam yap lăng giăm 400 klai prăk. Hơdôm tal tơlơi truh prong hơmâo laih ƀơi đơ đam lŏn ia ta. Rơ-ơ̆t kơtang ƀơi kual Kơdư; không phang kơsing pah, ia mơsin hram, tơhlŏm lŏn, hăng ia dăo yua ia blai đĭ hơmâo ƀơi kual lŏn dăo ia krông Cửu Long, Dap Kơdư; hơjan prong, hơmâo hơkruah kơthel, grom tar, hơjan pler hơmâo na nao pơ 19 boh tơring čar gah Kơdư hăng Kơdư Tong krah.

Tum pơƀut glăi mông jơnum, Kơ-iăng khua dêh čar ơi Trần Lưu Quang lăi rơđah bruă pơgang tơlơi truh lŏn adai ngă dŏ hơmâo 6 mơta tơlơi dŏ tơdu. Amăng anun tơdu amăng tơlơi pơmin mơnuih ƀôn sang, anom apăn bruă kơnuk kơna; bruă pel ĕp, wai lăng pơgang hlâo kơ bơyan hơjan kơthel lu anih aka ƀu klă ôh. Kơ-iăng khua dêh čar kiăng hơdôm ding jum, anom bruă hăng plơi pla prăp rơmet pơsir hĭ hơdôm tơlơi aka ƀu dưi ngă anai.