Thượng tướng Lương Tam Quang, Kơ-iăng Khua ding jum Kông ang Việt Nam hăng Kơ-iăng Khua anom bruă tơhan pôlih dêh čar Japan Ogata Yoshimi git gai mông jơnưm. Kơ-iăng khua ding jum Lương Tam Quang lăi rơđah, Jơnum bơkơtuai tal anai lĕ hrơi mông kiăng dua anom bruă lăng glăi boh than dưi ngă; pơlăi nao rai, ngă hrŏm, lăi nao tơpă sit hơdôm boh tơhnal dua bơnah đing nao; tŭ hrŏm jơlan gah, boh tơhnal ngă hrŏm sit nik, tŭ yua ƀiă dong, pơsir hĭ hơdôm bruă mơnuih ngă soh mơng dua bơnah amăng rơnuk phrâo, djơ̆ hăng tơlơi rơkâo amăng pơhlôm rơnuk rơnua, pơgăn ƀing ngă soh; pơgôp hrưn đĭ pran đăo gơnang kơplah wah dua bơnah, yua tơlơi dưi hrŏm kơplah wah dua boh dêh čar, laih dong, pơgôp pơhlôm rơnuk rơnua, hơđong hăng pơđĭ kyar amăng kual.

Amăng mông jơnum, hrŏm hăng pran giang mah, đăo gơnang hăng thâo hluh tơdruă, dua bơnah tŭ ư tŏ tui pơtrut kơtang tơlơi rô nao rai sit nik, tŭ yua, ngă hrŏm kjăp ƀiă dong amăng bruă gum hrŏm pơgăn ƀing ngă soh, pơhlôm hơđong tơlơi hơdip mơda, tơlơi yâo mơ-ak brơi mơnuih ƀon sang dua boh dêh čar Việt Nam - Japan.