Thun 2022, Jơnum min djuai ania kiăo tui hơdôm bruă mă phun hmâo jao, pok pơhai khut khăt, ha amăng plĕ, ba glăi bôh tơhnal hơdôm jơlan hơdră, hơdră bruă djuai ania, djru bơwih brơi tơlơi hơdip mơda bơwih ƀong – mơnuih mơna kơ neh wa kual djuai ania ƀiă hăng kual čư̆ siăng.

Amăng thun 2023, Jơnum min djuai ania pok pơhai dong sa dua bruă mă phun, amăng anun pơphun ngă tui klă hloh dong Jơlan hơdră pơkă mơng dêh čar pơđĭ kyar bơwih ƀong mơnuih mơnam kual neh wa djuai ania ƀiă hăng kual čư̆ siăng rơwang 2021-2030, tal 1: mơng thun 2021 truh thun 2025. Khua Ding jum, Khua Jơnum min Djuai ania Hầu A Lềnh brơi thâo, amăng hơdôm thun rơgao, Gong gai dêh čar ta hmâo laih lu hơdră bruă djru pơđĭ kyar bơwih ƀong kual neh wa djuai ania ƀiă hăng kual čư̆ siăng, amăng anun phun ñu lĕ bruă đang hmua. Anai ăt lĕ hơdôm tơhnal pơkă, bruă mă mơ̆ Jơnum min amra ngă tui pơ̆ anăp anai./.