Tơlơi pơtrun pơsit 57 dưi hmâo Ding jum kơđi čar mă yua lơ 22/12/2024, lăi rơđah pơđĭ kyar bôh thâo phrâo hơdră mă yua măi mok, pơplih phrâo pơčeh phrâo hăng pơplih mrô glăk jing bôh than pơsit pơđĭ kyar mơ̆ng hơdôm bôh dêh čar; jing tơlơi kiăng pơsit phun, mông gal klă hloh pioh dêh čar ta pơđĭ kyar pơdrŏng asah kơjăp kơtang amăng rơnuk phrâo – rơnuk phrâo hrưn đĭ pô mơ̆ng djuai ania. Grŭp črâo ba pơđĭ kyar bôh thâo phrâo, hơdră phrâo măi mok, pơplih phrâo pơčeh phrâo hăng pơplih mrô dưi pơjing, yua kơ Khua git gai Ping gah dêh čar ta ơi Tô Lâm ngă Khua Grŭp.

Pơjing Khul lăi pơthâo kơ pơđĭ kyar bôh thâo phrâo, hơdră phrâo măi mok, pơplih phrâo pơčeh phrâo hăng pơplih mrô hăng tơlơi gum hrŏm mơ̆ng ƀing juăt bruă amăng dêh čar hăng dêh čar tač rơngiao. Lu mơnuih juăt bruă lăi lĕ Tơlơi pơtrun pơsit 57 jing jơlan nao phrâo, pơčrang rơđah jơlan hrưn đĭ gah anăp mơ̆ng djuai ania Việt Nam. Anun lĕ kơnong kơ hmâo jơlan mut amăng hơdôm măi mok yôm, pơplih mrô kơtang, Việt Nam mơ̆ng dưi nao tañ, anăp nao kơtang hăng kơjăp pioh pơdrŏng asah kơjăp kơtang, angăk đĭ akô̆ hăng gum hrŏm hăng hơdôm bôh dêh čar ƀơi rŏng lŏn tơnah. Hrŏm hăng anun, tơlơi pơtrun pơsit pơsur khin hơtai, hmâo hơdôm hơdră pơphô hlâo, phara pioh ngă pơhưč mơnuih rơgơi hăng pơtrut tañ pơplih phrâo pơčeh phrâo lŏn ia. Tơlơi pơtrun pơsit pơdah tơlơi čang rơmang hrưn đĭ mơ̆ng djuai ania./.