Ƀơi Jarkatar, Indonesia, Khua anih jưh pơ ala dêh čar Vũ Hồ, Khua pơ ala SOM ASEAN Việt Nam ba jơlan khul khua Việt Nam nao pơhmư̆ mông jơnum khua mua pơprong ASEAN (SOM) hăng mông Jơnum tal 15 Grup mă bruă amăng Khul git gai črâo bruă ASEAN (ACCWG) kơ Timor-Leste mut amăng ASEAN.

Ƀơi mông Jơnum SOM, ƀing khua ASEAN hơmâo bơkơtuai hăng tŭ ư pok pơhai hơdôm bruă kiăng ngă hlâo mơng ASEAN amăng thun 2023, hơmâo pơtrut hăng rŭ glăi; pơđĭ tui tơlơi rơgơi hăng tŭ yua tơlơi phiăn mơng ASEAN; pơgăn glăi tơlơi rung răng rơnuk rơnua hơmâo phrâo. Amăng mông jơnum tal 15 Grup mă bruă Khul khua git gai črâo bruă ASEAN kơ bruă Timor Leste rơkâo mut amăng ASEAN, hơdôm boh dêh čar tŭ ư djru kơ Timor Leste apăn bruă hloh, amăng ƀrư̆ dưi ngă hơdôm tơlơi pơkă ngă ding kơna mơng ASEAN.