Amăng mông jơnun ƀing ding kơna Ping gah mơng Ƀirô Khua pơ ala mơnuih ƀon sang dêh čar hăng Khul apăn bruă Ping gah Kơnuk kơna pơčrông sai rơđah hơdôm boh than gum hrŏm kơplah wah dua bơnah, sit biă ñu ba tơbiă bruă jao, hơdră bruă, pơlăi nao rai tơlơi tơnap tap kiăng thâo hluh tơdruă, gum hrom kiăng ngă tŭ yua hơdôm bruă jao mơng dua bơnah hăng yua hơnong pơkă hrŏm.

Pơđut hĭ mông jơnum, Khua dêh čar ơi Phạm Minh Chính lăng yôm tơlơi gum hrŏm, pơlăi nao rai lơ̆m ngă tui bruă jao kơplah wah Ƀirô Khua pơ ala mơnuih ƀon sang dêh čar hăng Kơnuk kơna; đăo gơnang pơ anăp anai Ping gah Ƀirô Khua pơ ala mơnuih ƀon sang dêh čar hăng khul apăn bruă Ping gah Kơnuk kơna amra tŏ tui gum hrŏm kjăp, tŏ tui pơplih phrâo, hơdeč hmar lăp djơ̆ hăng tơlơi sit nik, sit biă ñu amăng čih pơkra tơlơi phiăn, hơdôm bruă pơprong, glêh tơnap, sit nik kiăng pơsir hĭ, ngă gêh gal pơđĭ kyar lŏn ia.